October 15, 2018

Presio dagiti magatgatang a para iti Noche Buena, bassit laeng ti nguminaanna

Saan unay nga apektaran ti nangato nga inflation rate (panagsuek ti balor ti pisos) ti presio dagiti magatgatang a para iti Noche Buena, kas kuna ti Department of Trade and Industry (DTI).

Segun ken ni DTI Undersecretary Ruth Castelo, adda laeng iti 3-8% ti epekto ti implasion iti presio dagiti nasao a produkto. Iti nalawag a pannao, katukad laeng daytoy ti 20 a sentabo agingga iti maysa a pisos ti nginaanna.

Innayon daytoy a saan met a ngumina amin a produkto.

Maipalagip nga immabot iti 6.7% ti inflation rate iti pagilian itay Septiembre, kangatuan iti napalabas a siam a tawen.

Manamnama nga iruar ti DTI ti baro a suggested retail price (SRP) wenno pagbasaran a presio dagiti maimenudo (retail) a produkto iti daytoy Nobiembre 15 a tiempo met ti panaggagatang dagiti managsapsapa a para iti tiempo ti Paskua.

Mainaig pay iti daytoy, mangnamnama ti Bangko Sentral ng Pilipinas (BSP) nga agsubli iti normal ti inflation rate ti pagilian iti iseserrek ti 2019.


(Naipablaak iti Oktubre 22, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

No comments:

Post a Comment