August 13, 2018

Nagsardeng a nagbasa, maipaayan iti pamuonan nga adal, kinuna ti DepEd

Nupay umad-adu dagiti sumrek nga agbasa kadagiti pagadalan, impanamnama ti Departamento ti Edukasion nga ituloyna nga ipaayan iti gundaway a maaddaan iti pamuonan nga adal (basic education) dagiti nagsardeng a nagbasa (droput).

Daytoy ti impanamnama ni DepEd USEC Nepomuceno Malaluan iti panagsaritana a kas kangrunaan a sangaili iti panagturpos dagiti nakalpas ken nakaruar iti pannubok iti Accreditation & Equivalency iti tawen 2016 ken 2017 iti Dibision ti Ilocos Norte a naangay iti Teatro Ilocandia, MMSU-Batac, idi Hulio 27, 2018.

“Ipakita ti rekord ti panagngato ti participation rate iti pormal a pagadalan," impadamag ni Malaluan. "Ngem nupay kasta, itultuloy ti Alternative Learning System ti mangipaay iti gundaway a maaddaan iti pamuonan nga adal dagiti kameng ti komunidad nga iti nadumaduma a rason, saanda a nakapagtuloy a nagadal iti pormal nga eskuela.”

Kadagupan dagiti naggraduar iti Dibision ti Ilocos Norte, 128 dagiti lallaki ken 293 dagiti babbai. Itoy a bilang, 17 ti nagleppas iti lebel ti elementaria, 412 met iti hayskul. Innem met kadagiti naggraduar ti agtawen iti 60 agpangato wenno senior citizen.

Ni Glaiza Prodenciano, naasawaan ken ina ti uppat ti nangyebkas iti mensahe iti nagan dagiti nagturpos a kas kangatuan iti klaseda. Iti panagsaritana, imburayna ti pakasaritaan ti panagbiagna manipud iti Leyte a nakayanakanna. Simrek a kas agtagibalay agingga a nakaasawa iti taga-Piddig, Ilocos Norte.

Nadakamatna pay nga idi napan ti maysa a mannursuro iti ALS (ALS mobile teacher) iti barangayda tapno agawis kadagiti kayatna iti agenrol ti ALS, ginundawayanna dayta.

Maysa a programa ti DepEd ti Alternative Learning System (ALS). Saan a sumrek dagiti estudiante iti pagadalan no di ket maikkanda kadagiti adalenda iti bukodda nga oras. Apaman a maileppasda dagiti naited nga adalenda, agdalanda iti eksaminasion. No mairuarda, masertipikaran dagitoy a nakalpas iti tukad nga inyenrolda, elementaria man wenno sekundaria. (JACOBINO GALZOTE, JR.)


(Naipablaak iti Bannawag iti Agosto 20, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan laeng iti buqo.ph ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.) 

No comments:

Post a Comment