August 27, 2018

Filipinas, Myanmar, nagtulag para iti agrikultura

Agtinnulongen ti Filipinas ken Myanmar a mangpapigsa iti sektor ti agrikultura ti tunggal pagilian, nangruna iti panagpaadu ti makalapan nga ikan.

Iti katulagan a napirmaan itay nabiit, indiaya ti Filipinas ti panagtinnulong iti tay-ak ti panagkalap ken ti pannakabangon dagiti pasilidad iti panagproseso iti Myanmar. Malaksid kadagitoy, indiaya ti Filipinas iti Myanmar ti itutulongna iti panagpaadu iti apit a balatong ken panagyeksport iti piek, karne, produkto manipud iti karne, ken lasona ken bawang.

Maibatay iti katulagan, maisayangkat dagiti mapagtinnulongan nga aktibidad iti dua a tawen.

Iti biang ti Myanmar, inkarina met ti itutulongna iti tay-ak ti panagproseso iti taraon, panagpaadu iti pasayan, bin-i, nuang ken pagpastoran ken dagiti makina a para iti agrikultura.

Am-ammo ti Myanmar nga agrikultural a pagilian, ken maibilang ti sektorna iti agrikultura a kas duri ti ekonomiana.


(Naipablaak iti Septiembre 3, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

No comments:

Post a Comment