Kas pammigbig iti nabaknang a kontribusionna iti ilina iti tay-ak ti kultura ken arte, pinadayawan itay nabiit ti Santo Domingo, Ilocos Sur daydi Pelagio “Pel” Alcantara, premiado a mannurat ti Bannawag. Kaduana a napadayawan ti walo pay a dadduma a maibilang met a pagwadan nga annak daytoy nadur-asen nga ili (a paset ti Metro Vigan) nga idauluan da Mayor Amado Tadena ken Bise-Mayor Floro Tadena.
Naitampok ti seremonia ti pammadayaw iti “Rabii Dagiti Umili” a naangay iti People’s Coliseum ti ili idi Mayo 12, 2018, kas paset ti pangigibus a selebrasion iti maika-276 nga anibersario ti pannakabangon ken piesta metten daytoy nga ili.
Inawat ni Mrs. Crescencia Robianes-Alcantara, retirado a propesora iti Don Mariano Marcos Memorial State University Mid-La Unon Campus (DMMMSU-MLUC) iti Siudad ti San Fernando, La Union, ti plake a para iti kaingungotna a binayabay ti sumagmamano kadagiti annakna manipud ken ni Gob. Ryan Luis Singson, ti kangrunaan a sangaili ken nagbitla nangidaulo iti seremonia ti pammadayaw.
Nailanad iti plake ti pammigbig ken ni Alcantara a kas pagulidanan a maestro, mannurat iti sarita ken salaysay, dramaturgo, opisial ti gobierno ken kompositor ti musika. Maysa a matagtaginayon a putarna ti Himno ti Santo Domingo.
Dagiti dadduma pay a napadayawan: Alberto R. Singson, agrikultura; Mrs. Gloria T. Rosario, idudur-as ti barangay; Godofredo T. Ingan, serbisio publiko; Florentino O. Tesoro, PhD, siensia ken teknolohia; Mrs. Milagros N. Fagel, negosio; Mrs. Rufina D. Soliven, modelo a pamilia ti OFW; Mr. & Mrs. Marcelino O. Ingan, modelo a pamilia lokal; ken Bibiano E. Figueras, kultura ken arte (posthumous a kas ken ni Alcantara).
(Naipablaak iti Bannawag, Hunio 4, 2018 a bilang.)
No comments:
Post a Comment