Impakaammo ti Department of Budget and Management (DBM) itay nabiit nga adda 75,242 a bakante a puesto a para kadagiti mannursuro iti tawen ti eskuela 2018-2019.
Kinuna ni Budget Secretary Benjamin Diokno a silulukat dagitoy a puesto dagiti mannursuro iti kindergarten, elementaria, junior high school, ken senior high school.
Iti daytoy a dagup, maawat ditoy ti 40,642 a titser iti kindergarten ken elementaria, 34,244 a titser iti junior high school, ken 356 a titser iti senior high school.
Iti agdama, adda 880,000 a titser kadagiti eskuela a para iti publiko.
Innayon ni Diokno a saanen a maingato ti sueldo dagiti titser iti daytoy a tawen ta naingaton ti take-home pay dagitoy babaen ti Salary Standardization Law (SSL) ken ti Tax Reform for Acceleration and Inclusion (TRAIN) law.
Agsueldo dagiti Teacher I nga addaan iti Salary Grade 11 iti P20,179 iti binulan (wenno P242,148 iti tinawen) idinto nga umawatda iti P74,358 a bonus ken alawans iti kada tawen— wenno agdagup iti P26,375 ti maganarda iti tunggal bulan.
(Naipablaak iti Bannawag, Mayo 7, 2018 a bilang.)
No comments:
Post a Comment