May 5, 2017

Landbank, nangilatang iti P1-B para iti e-jeepney

Iti panggep ti gobierno a mamagbalin kadagiti amin a para pasahero a dyip iti pagilian a pagandaren ti koriente, nangilatang ti Land Bank of the Philippines iti 1 bilion a pisos a pautang tapno adda usaren dagiti kooperatiba ken organisasion ti transportasion a mamagbalin a moderno kadagiti uggorda a para pasahero a dyip.

Paset daytoy ti katulagan a pinirmaan ti nasao a banko nga imbagian ti chairman daytoy a ni Carlos Dominguez ken ti gobierno babaen ken ni Department of Transportation Secretary Arthur Tugade.

Kinuna ni Dominguez a paset daytoy ti plano ti administrasion ni Presidente Duterte a mamagbalin a moderno kadagiti 220,000 a dyip a para publiko iti sibubukel a pagilian, kas paset ti gannuat ti gobierno a mangipaay iti nataltalged a sistema ti transportasion para kadagiti biahero bayat ti itutulong met ti gobierno a mangkontrol iti epekto ti climate change.


(Naipablaak iti Bannawag, Mayo 15, 2017 a bilang.)

No comments:

Post a Comment