Laban kontra kontraktualisasion, agtultuloy

Impanamnama ti Department of Labor and Employment (DoLE) nga agtultuloy ti kampania daytoy kontra iti ilegal a panagkontrata ken panag-sub-contract ken ti pannakaipasigurado nga ad-adu a mangmangged ti agbalin a regular iti trabahoda iti pannakaiwayat ti Department Order (DO) 174.

Daytoy ti impanamnama ni Labor Undersecretary Joel Maglunsod kalpasan a nakiuman kadagiti nadumaduma a grupo dagiti mangmangged.

Kinuna ni Maglunsod a dengdenggen ti DoLE dagiti pakaseknan dagiti mangmangged, idinto a kasapulan met ti departamento ti tulong dagitoy. Ginutigotna a makikaykaysa dagitoy iti pannakairupir dagiti karbenganda ken ireportda dagiti kompania ken employer nga abusado ken agtultuloy a mangyim-implementar iti ilegal a kontraktualisasion.

Innayon ni Maglunsod nga ikagkagumaanan ti DoLE ti mangsiput kadagiti nadumaduma a kompania iti pagilian tapno masigurado nga agtungtungpal dagitoy iti baro a department order.


(Naipablaak iti Mayo 8, 2017 a bilang.)