Maangay ti “Libro Ilokano 2015: 1st Ilokano Book Fair” iti daytoy a Hulio 30 ken 31 iti University of Northern Philippines (UNP) Auditorium iti Siudad ti Vigan.
Pagtinnulongan nga iwayat ti GUMIL Filipinas (GF) ken UNP Center for Ilokano Studies ti nasao a book fair iti pannakitinnulong ti National Book Development Board (NBDB) ken ti Komisyon sa Wikang Filipino (KWF).
Tampok ditoy ti pannakailako dagiti libro nga Ilokano nga impablaak ti GF ken dadduma pay nga independiente a pablaakan ken ti pannakayalnag dagiti libro maipapan iti kontemporaneo a piksion nga Ilokano ken literatura a para ubbing.
Manamnama met nga ilako dagiti kangrunaan a bookstore ken publisher iti pagilian a kas iti National Bookstore, UP Press, Anvil, Lampara, Adarna, KWF, Librong Lira, ken Visprint, dagiti kapipintasan a libroda maipapan iti piksion ken edukasion.
Iti Hulio 31, maiwayat ti panaglektiur maipapan iti literatura, panagsurat ken panagipablaak iti libro. Naawis nga agsarita dagiti nalatak nga autor a Tagalog kas kada Bebang Siy, Eros Atalia, ken Dr. Michael Coroza, ken dagiti mabigbigbig nga Ilokano a mannurat a kas kada Sherma E. Benosa, Anna Liza M. Gaspar, ken Neyo Mario E. Valdez.
Napili a tema daytoy umuna a book fair ti “Lagip ni Don Belong, Iti Libro Mataginayon” a kas pammadayaw ken ni Don Isabelo de los Reyes (1864-1938), nalatak nga Ilokano a politiko, mannurat, labor activist, ken rebolusionario a lider manipud iti Vigan.
Tamingen ni mannurat ti Bannawag Gregorio T. Amano ti Vigan dagiti kontribusion ni Don Belong iti literatura nga Ilokano ken iti panagsurat ken panagipablaak iti libro.
“Manamnama a daytoy Libro Ilokano 2015, maysa manen a naisangsangayan a pagteng iti literatura dagiti Ilokano. Namnamaenmi a pagtitiponen daytoy a gannuat, saan laeng a dagiti mannurat ken publisher nga Ilokano, no di pay ket ipakitana a ditoy Kailokuan, sibibiag ti panagipablaak iti libro,” kinuna ni GF President Arthur P. Urata, Sr.
Namnamaen ti GF ti pannakaparnuay ti dakdakkel pay a panaginteres kadagiti reading materials a nakasurat iti Ilokano a kas mayannurot iti mother tongue-based multilingual policy ti edukasion iti pannakayimplementar ti K to 12 a programa ti Department of Education (DepEd).
Maawis dagiti sabsabali pay nga interesado a publisher ken autor a makipaset iti book fair ken tapno ilakoda dagiti libro, journal, magasin ken dadduma pay a reading materials a sinurat, impablaak wenno urnongda.
Para iti ad-adu pay nga impormasion mainaig iti Libro Ilokano 2015, kontaken ni Ms. Alma Somera ti UNP Center for Ilokano Studies kadagiti sumaganad a numero: 0916-2562235 ken 0998-7779768 wenno bisitaen ti Libro Ilokano 2015 events page iti Facebook.
(Naipablaak iti Bannawag, Hulio 20, 2015 a bilang.)
No comments:
Post a Comment