February 2, 2015

Panagkurang ti koriente iti kalgaw, nakasaganan ti gobierno

Nakasaganan ti gobierno a mangipakat kadagiti addang tapno malapdan ti panagkurang ti suplay ti koriente iti daytoy a kalgaw idinto nga ur-urayen ti Malakanyang ti pananganamong ti Kongreso iti pannakaipaay dagiti “special powers” iti Presidente tapno marisutna daytoy posible a panagkurang ti suplay ti koriente.

Impanamanama daytoy ni Presidential Communications Operations Secretary Herminio Coloma, Jr., kas sungbat iti panagam-ammak ti dadduma a sektor iti posible a panagkurang ti suplay ti koriente iti Luzon itoy a kalgaw.

Idi pay Septiembre a kidkiddawen ni Presidente Aquino ti panangited kenkuana ti Kongreso iti bileg, iti babaen ti Electric Power Industry Reform Act (EPIRA), tapno sumrek iti kontrata kadagiti agpatpataud iti koriente; iti kasta, manamnama ti kaadda ti umdas a suplay ti koriente iti kalgaw ti 2015.

Iti biang ti Kongreso, ad-adalenna pay laeng ti kiddaw ti Malakanyang ta adda met dagiti agkuna a saan a pudno nga adda panagkurang ti suplay ti koriente itoy a kalgaw.


(Naipablaak iti Bannawag, Pebrero 9, 2015 a bilang.)

No comments:

Post a Comment