Pinirmaan ni Presidente Benigno S. Aquino III itay Pebrero 10, 2015 ti Proklamasion Bilang 968 a nangideklara iti bulan ti Abril a kas Nailian a Bulan ti Literatura (National Literature Month wenno Buwan ng Panitikang Filipino).
Sagudayen ti nasao a proklamasion, kas mayannurot iti Konstitusion, itandudo ti gobierno ti pannakataginayon ken pannakaitandudo dagiti historikal ken kultural a tawid ken rekursos, kasta met dagiti artistiko a partuat. Gapu ta ti Literatura iti Filipinas, a nasurat kadagiti nadumaduma a lengguahe iti Filipinas, ket mainaig kadagiti historikal ken kultural a gameng, rebbengna laeng nga itandudo daytoy ti gobierno.
Nadakamat pay iti proklamasion a nasken laeng a tagibenen ti gobierno ti nailian a literature gapu ta dakkel ti akem ti daytoy iti pannakataginayon dagiti pagtitinnawidan a tagipatgen (values) dagiti Filipino.
Sagudayen pay ti nasao a proklamasion nga iti bulan ti Abril a mailagip ni Francisco “Balagtas” Baltazar, ken marambakan ti kasangay ken ipupusay dagiti adigi ti literatura ti pagilian a kas kada Emilio Jacinto, Paciano Rizal, Nick Joaquin, Edith Tiempo, Bienvenido Lumbera, kdp.; ken iti daytoy a bulan a maramrambakan ti International Children’s Book Day, International Day of the Book wenno World Book Day, ken ti World Intellectual Property Rights Day.
Nadakamat pay iti proklamasion nga idauluan ti National Commission for Culture and the Arts (NCCA) ken ti Komisyon sa Wikang Filipino (KWF) ken dagiti kangrunaan nga ahensia iti gobierno ti pannakaisagana ken pannakaiwayat dagiti aktibidad a mainaig iti pannakarambak ti Nailian a Bulan ti Literatura. Magutigot met dagiti amin a departamento, ahensia ti gobierno ken dagiti pribado a gunglo ken ahensia a tumulong iti NCCA ken KWF, ken iti pannakipartisiparda iti nasao a selebrasion.
Mainaig itoy, maipalagip nga idi Abril 16, 2001, babaen ti Proklamasion Bilang 26, indeklara ni dati a Presidente Gloria Macapagal Arroyo ti Abril a kas Bulan ti Literatura nga Ilokano a tinawen met a ramrambakan ti GUMIL Filipinas, ti gunglo dagiti mannurat nga Ilokano, ken dadduma pay a gunglo dagiti mannurat nga Ilokano.
(Naipablaak iti Bannawag, Marso 2, 2015 a bilang.)
No comments:
Post a Comment