Kuna ti IMF: Panagsuek ti presio ti langis, padur-asenna ti sangalubongan nga ekonomia

Patien dagiti opisial ti International Monetary Fund (IMF) a saan a pakdaar iti igiginad ti panagdur-as ti sangalubongan nga ekonomia ti panagsuek ti presio ti langis no di ket pagilasinan daytoy ti isasantak ti ekonomia, nangruna kadagiti pagilian nga agpampannuray iti gatgatangenda a langis kadagiti sabsabali a pagilian.

Kastoy met laeng ti kapanunotan dagiti opisial ti US Federal Reserve ken ti European Central Bank. Kunada a ti panagsuek ti presio ti langis, makapasayaat kadagiti konsiumer ken kadagiti agparpartuat.

Sakbayna, adda dagiti ekonomista a mamati a pagilasinan ti panagsuek ti ekonomia ti dandani 40 a porsiento a bimmabaan ti presio ti langis iti sangalubongan a merkado ta bumasbassiten ti panagkasapulan iti langis.

Mainaig daytoy a pammati iti panagbatbatay dagiti ekonomista kadagiti napalabas nga ilalaka ti presio ti langis iti igigiddan met ti panagsuek ti ekonomia ti lubong.

Ngem sabali ti agdama a mapaspasamak, kas kuna dagiti ekonomista, ta dimmur-asen ti teknolohia iti panagkulukol iti langis, malaksid nga immadu ti langis nga aggapu iti Libya, ken adda pay ti mapapati a panggep dagiti dadduma a pagilian iti Middle East a mangipalaka iti produktoda a langis tapno mapaksiatda iti merkado dagiti dadduma a pagilian a pagtataudan ti langis.

Idi Hunio 20 itoy a tawen, mapan a US$114.55 ti sangabariles a crude oil (Brent crude oil). Ngem itay Dis. 15, nagbalinen a US$62.53.


(Naipablaak iti Bannawag, Disiembre 29, 2014 a bilang.)