Angayen ti GUMIL Filipinas, ti gunglo dagiti mannurat nga Ilokano iti sangalubongan, ti Dap-ayan 2015: Ti Maika-47 a Nailian a Kombension ti gunglo inton Abril 17-19, 2015 iti maikeddeng a lugar iti uneg ti Kamanilaan, babaen ti panagsangaili ti GUMIL Metro Manila, ken iti pannakitinnulong ti sumagmamano nga institusion a pribado ken ti gobierno.
Daytoy ti napagnunumuan iti GF Board Meeting a naangay itay Nobiembre 23, 2014 a sinangaili ni GUMIL Pangasinan President Fernando B. Sanchez ken ti pamiliana iti San Nicolas, Pangasinan.
Kas kinuna ni GF President Arthur P. Urata, Jr., tampok iti daytoy a kombension ti pannakapadayaw kadagiti mannurat a nangab-abak kadagiti pasalip, pannakayalnag dagiti libro nga impablaak ti gunglo ken dagiti kamengna, panagsisinukat iti kapanunotan mainaig iti pannakaipatungpal dagiti panggep ti gunglo para kadagiti mannurat nga Ilokano ken iti Kurditan Ilokano. Ken maangay ti eleksion ti GF.
Kadagiti amin a kameng ti GF ken dagiti chapter-na, makiuman kadagiti chapter president para iti advance a reserbasion ken dadduma pay a detalye a mainaig iti kombension. Kadagiti saan met a kameng pay ti GUMIL nga interesado a dumar-ay iti nasao a kombension, makiuman ken ni Ariel S. Tabag, presidente ti GUMIL Metro Manila, babaen ti e-mail: asseng.tabag@gmail.com
Iti sabali a bangir, maipakaammo nga inaprobaran ti GF Board ti pannakabukel ti GUMIL Apayao babaen ti panangyendorso ni GUMIL Cagayan president Dr. Freddie Pa. Masuli.
Kabayatanna, ipakaammo ti GF Awards Committee nga agawaten kadagiti nominasion para iti Pedro Bucaneg Award, Leona Florentino Award, ken Don Cornelio Valdez Award. Aggibus ti nominasion iti Pebrero 27, 2015. Para iti kompleto a pagalagadan dagiti nasao nga awards, ag-e-mail iti rvaragon@gmail.com wenno bisitaen ti balikasniilokano.blogspot.com. (RVA)
(Naipablaak iti Bannawag, Disiembre 8, 2014 a bilang.)
No comments:
Post a Comment