Saan a maragsakan ti Commission on Elections (Comelec) iti bilang dagiti nagparehistro a botante iti umuna a dua a bulan ti panagparehistro a para iti eleksion inton Mayo 2016.
Kinuna ni Chairman Sixto Brillantes, Jr. a mapan a 500,000 a botante laeng iti sibubukel a pagilian ti nakapagparehistro idinto nga adda 9 a milion a botante a nasken a baliwanda ti panagparehistroda gapu ta awanan dagitoy iti biometrics.
Iti datos ti biometrics, automatiko a maammuan ti kinaasino ti maysa a tao, kangrunaanna babaen ti retrato, fingerprint, ken pirmana ta nakarekord dagitoyen iti kompiuter.
Sagudayen ti Republic Act 10367 wenno ti Mandatory Biometrics Registration Act of 2013, asino man a botante nga awanan iti biometrics, maikkat ti naganna iti listaan dagiti botante ket saanto a makabotos iti eleksion inton Mayo 2016.
Nangrugi ti panagparehistro dagiti botante idi Mayo 6, 2014 ket aggibus daytoy iti Oktubre 31, 2015.
(Naipablaak iti Bannawag, Agosto 11, 2014 a bilang.)
No comments:
Post a Comment