Kuna ti Department of Foreign Affairs (DFA) nga imbes nga aglemlemmeng dagitoy a Filipino, agaplayda koma para iti Deferred Action on Childhood Arrivals (DACA).
Kinuna ni Philippine Embassy in Washington, DC Consul Arlene Magno a ti panagbutbuteng dagitoy agraman ti pamiliada iti mabalin a mapasamak kadakuada no rummuarda ti manglaplapped kadagitoy a manggundaway iti panagaplayda.
Iti naudi a quarterly report-na a rimmuar idi Marso, impakaammo ti US Citizenship and Immigration Service nga addan 4,041 a Filipino a nagaplay para iti DACA ket adda metten 3,644 a naaprobaran ti panagbalinda a makipagili iti America. Kuna ti Migration Policy Institute nga iti agdama, adda 20,000 a Filipino a rumbeng koma nga agaplayda para iti DACA.
Inlawlawag ni Tatyana Delgado ti Catholic Legal Immigration Network, Inc. a ti DACA ket saan a nairanta a pangtiliw kadagiti illegal nga imigrante malaksid no kabusor ti estado dagitoy.
Innayonna a no saan a maaprobaran ti aplikasionna, awan met ti ania a maaramid kontra iti illegal nga imigrante a simrek iti America idi ubing pay.
(Naipablaak iti Bannawag, Agosto 25, 2014 a bilang.)
No comments:
Post a Comment