“K to 12” grinaduan dagiti titser iti “B”

No estudiante koma ti “K to 12” a programa ti Department of Education (DepEd), agingga laeng iti “B” ti maigrado dagiti titser manioud kadagiti para publiko nga eskuela a kameng ti Teachers’ Dignity Coalition (TDC).

Intedda daytoy a grado bayat ti Senate committee on education hearing itay nabiit nga inlungalong ni Sen. Pia Cayetano a pangulo ti nasao a komite.

Karaman iti nasao a hearing dagiti pannakabagi ti DepEd, CHED, dagiti pribado nga eskuela ken dadduma pay a gunglo dagiti titser.

Kuna ti TDC, ti organisasion nga addaan iti kameng a 30,000, nga iti laksid t dua a tawenen a pannakaipakpakat ti “K to 12,” adda pay laeng daytoy iti “trial stage.”

Ti met grado a “B”, kayatna a sawen ket “Beginning” wenno 74 porsiento ken nababbaba, segun daytoy iti sistema ti panaggrado ti programa a “K to 12.”

Kuna ni Benjo Basas a pangulo ti TDC a naibatay ti nababa a grado kadagiti problema a limtuad kabayatan ti dua a tawen a pannakayimplementar ti “K to 12” agraman kadagiti umuna a bulan ti agdama nga school year.

Intudona dagitoy a problema: panagkurkurang dagiti tugaw, siled-pagadalan, danum, ken pasilidad iti kinadalus, ken dagiti pasilidad iti kindergarten.

Dinakamat pay ni Basas a maysa pay kadagiti problema ti panagkurkurang kadagiti masapsapul iti panagisuro ken manual. Masapul pay ngamin nga ag-download dagiti titser manipud iti website ti DepEd ket ipakopiada dagitoy babaen ti bukodda a kuarta.

Innayon pay ni Basas a maigapu pay ti nababa a grado iti di umdas a panagsanay wenno training dagiti titser para iti baro a kurikulum. Agkurkurang pay dagiti titser a para iti kindergarten ken iti senior high school.
Maibatay iti kuenta, inton addan sumrek iti Grade 11 inton 2016 ken Grade 12 iti sumaruno a tawen, masapulton ti ad-adu a titser. Kabayatanna, agpukaw met iti estudiante iti First Year dagiti kolehio a pagangayanna met ti pannakapukaw ti trabaho dagiti titser iti kolehio.

Ginutigot ti grupo ti Senado a repasuenda ti linteg iti “K to 12” ket siripenda ti kapasidad ken ngipen ti gobierno para iti naur-urnos a pannakaipakat daytoy a programa.

Kinarit pay ti TDC ni Presidente Benigno Aquino III a risutenna ti panagkurkurang ti pasdek dagiti eskuela.


(Naipablaak iti Bannawag, Hulio 21, 2014 a bilang.)