DepEd Ilocos Sur, bagnosna ti Bannawag iti ortograpia

Dr. Estrella Oliver-Soria

Maysa a karetretirona nga opisial ti Departamento ti Edukasion (DepEd) iti Ilocos Sur ti nagkuna a ti Bannawag ti agpapaay a bagnos ti DepEd Ilocos Sur iti pannakaipatungpal ti Mother Tongue-Based Multilingual Education (MTB-MLE) kadagiti pagadalan iti elementaria iti Ilocos Sur iti agdama.

“Manipud pay idi 2012 a pannakairusat ti MTB-MLE a programa ti DepEd, nagtalinaed ti Schools Division ti Ilocos Sur a nangar-aramat iti ortograpia nga us-usaren ti Bannawag a bagnosda,”  kinuna ni Dr. Estrella Oliver-Soria, a nagretiro itay laeng nabiit a kas Assistant Superintendent.

Inlawlawag ni Dr. Soria, dati a sekretaria ti Gunglo dagiti Mannurat nga Ilokano (GUMIL) iti Ilocos Sur, a nupay adda nayam-ammo a baro a kita ti ortograpia a gapuanan ni Dr. Joel Lopez ti DepEd Ilocos Norte, “saan a dayta ti sinurotmi iti DepEd Ilocos Sur no di ket ti nakairuamanmi ken patienmi nga umisu nga ortograpia nga ar-aramaten ti Bannawag.”

Mararaem nga opisial ti DepEd, nagserbi ni Dr. Soria iti DepEd iti 38 a tawen, 12 a tawen kadagitoy a kas Asst. Division Superintendent ti DepEd Ilocos Sur. Isu ti asawa daydi Dios-ti-aluadna a Marcelino Soria, nagbise-presidente ti GUMIL Ilocos Sur idi 1977-78, maysa a maestro ken mannurat met ti Bannawag. (Djuna R. Alcantara)


(Naipablaak iti Bannawag, Hunio 16, 2014 a bilang.)