PANAGMAMANGGA MANEN. No kastoy a kapudot ti tiempo, di maliklikan ti itataud dagiti nadumaduma a sakit ti mangga kas iti panagtaud ti ngisit (anthracnose) ken panaglungsot (stem-end-rot) kalpasan a maburas dagitoy sa mailako iti merkado. Ngem babaen ti partuat ti Mariano Marcos State University-College of Engineering nga Automated Hot Water Treatment (AHWT) para iti mangga, bimmaba iti 30 porsiento wenno nakurang a maysa a porsiento laengen ti dadael dagiti mapaluom a mangga babaen ti nasao a kabaruanan a teknolohia a pinonduan ti Department of Science and Technology. Kas ken ni Apo Ricardo “Carding” Tolentino (adda iti ladawan), presidente ti Ilocos Norte Mango Stakeholders Association, Inc. ken cooperator ti nasao a teknolohia, ad-adda nga immadu ti ganansiana gapu iti panangaramatna iti daytoy a teknolohia a bimmassit dagiti maperdi (reject) sakbay a may-export dagitoy iti Hong Kong, China ken Japan a kangrunaan a gumatgatang kadagiti mangga manipud iti Ilokos ken Cagayan. Kadua ni Mang Carding iti ladawan dagiti sumagmamano nga opisial ti DOST a da Dr. Paulina Nebrida (S&T Promotions Center Manager, DOST I), Jonathan Viernes (Provincial Director ti DOST-Ilocos Norte), Engr. Thomas Ubińa ti MMSU-COE ken project team leader ti nasao a teknolohia, ken dadduma pay a cooperators ti DOST. (Leilanie G. Adriano)
(Naipablaak iti Bannawag, Mayo 13, 2013 a bilang.)
No comments:
Post a Comment