Pagbalinen ti nasao a linteg nga inkapilitan ti kindergarten para kadagiti aglima-ti-tawenna nga ubbing ken nayonanna iti dua a tawen ti basic education curriculum.
Ti baro a 12-a-tawen a pamuonan nga adal ket buklen ti innem a tawen a panagbasa iti elementaria (Grado 1 agingga iti 6), uppat a tawen a junior high school (Grado 7 agingga iti 10) ken nainayon a dua a tawen a senior high school (Grado 11 ken 12).
“Panggep ti mainayon a 2 a tawen kalpasan ti maikapat a tawen iti hayskul ti ad-adda pay a pannakaasa ti kabaelan dagiti estudiante iti napilida a tay-ak ti adal wenno kurso iti arts ken sports, tehnical vocational, entrepreneurship wenno tertiary education,” kas kinuna ni DepEd Secretary Armin Luistro.
Kas kangrunaan met nga autor ti linteg (Senate version), kinuna ni Sen. Ralph Recto (LP), nga iti napapaut a panagadal dagiti ubbing, manamnama a magun-od ti kasapulan a kalidad ti edukasion ken ipadana ti Filipinas iti kalidad ti edukasion kadagiti sabsabali a pagilian.
Maysa pay kadagiti kangrunaan a dinakamatna ti panangiramanna iti linteg ti pannakausar ti “mother tongue” wenno nakayanakan a pagsasao a kas lengguahe a pangisuro manipud iti pre-school (kindergarten) agingga iti Grado 6 tapno mapadaras ti panagsursuro dagiti ubbing.
Kunana a maibatay kadagiti kaudian a panagadal iti sangalubongan, napaneknekan a nadardaras ti panagsursuro dagiti agad-adal no mausar ti nakayanakan a pagsasao.
Maipakat ti kurikulum para iti Grado 2 ken Grado 8 iti umay a panagseserrek 2013-2014 agingga iti naan-anay a mayimplementar ti K-to-12 iti 2016, kas kinuna ni Sekretario Luistro.
(Naipablaak iti Bannawag, Hunio 3, 2013 a bilang.)
No comments:
Post a Comment