Ilokano Book Festival iti LU, angayen ti SPADE

Angayen ti Sir Pelagio Alcantara Development (SPADE) Foundation ti umuna a proyektona ita a tawen, ti Ilokano Book Festival a maangay inton Pebrero 16 iti Multipurpose Hall ti Don Mariano Marcos Memorial State University (DMMMSU) – Open University System iti Siudad ti San Fernando, La Union.

Kuna ti SPADE a mairuknoy daytoy a pagteng iti pannakatagiben ti pagsasao nga Ilokano babaen ti pannakaipabuya dagiti aganay a 60 a koleksionna a libro ti dandaniw, sarita, nobela ken dadduma pay a kita ti Literatura Ilokano.

Kadua ti SPADE a mangiwayat iti festival ti Schools Division ti probinsia ken siudad a paggapuanto dagiti mannursuro kadagiti pagadalan elementaria nga umayto makipagrambak.

\Maipasetto iti eksibit ti maysa a booklet ti nailadawan a dandaniw a para ubbing a gapuanan daydi Apo Pelagio A. Alcantara, a maysa met a mabigbig a maestro ken mannurat iti Bannawag idi panawenna, kas kinuna ni Djuna R. Alcantara, executive director ti SPADE.

Maysa kadagitoy a daniw ti maipapan ken ni Rizal idi ubing. Adda met maipapan iti kinasangsangayan dagiti kayo-- ti patarus daydi Apo Alcantara manipud iti “Trees” a putar ni Joyce Kilmer. Masarakan daytoy a patarusna a nai-billboard iti La Union Botanical Garden iti Siudad ti San Fernando ken iti Flora Elementary School iti Santo Domingo, Ilocos Sur, a nagpaayanna a prinsipal idi kabambannuaganna.

Kas pangpangayed iti parambak, addanto pay dinnaniwan ken panagsaribitniw a pagakemanto dagiti napili nga ubbing ti La Union. Ken kasta met nga addanto grupo dagiti mannursuro a mangipabuya iti laingda nga agsala ken agkanta. (SPADE Foundation)


(Naipablaak iti Bannawag Enero 21, 2013 a bilang)