Tumpaw, di lumned, daytoy a pagpakan kadagiti lames

Ni CRIS M. ILUSTRE

STO. DOMINGO, Ilocos Sur—Iti maikadua a gundaway, nagiwaras ni Diputado Ryan Singson iti “floating feeds” iti aganay a 200 a mangngalap iti daytoy nga ili tapno usarenda a pagpakan kadagiti tarakenda a bangus, tilapia wenno paltat.

Aganay a 800 a sako dagitoy a pagpakan, a kas impakaammo ni Diputado Singson, dakkel ti maitulongna iti naparpardas a panagdakkel dagiti lames iti uneg laeng ti tallo a bulan imbes nga innem a bulan a kadawyan a pannakatarakenda. Ti kabaruanan a teknolohia manipud idiay Thailand ti naipakat iti pannakapartuat dagitoy a pagpakan.

Saan a kas kadagiti ordinario a pagpakan a no di kanen ida dagiti lames, lumnedda iti lansad a puon metten ti panagrupsada ken itataud ti sabibong a pakaigapuan ti fishkill wenno pannakatay dagiti bangus ken tilapia a kas iti napasamak idiay Laguna, Batangas, Pangasinan ken dadduma pay a paset ti Filipinas.

Impalawag met ni Barangay Chairman Bong Artajos iti Siudad ti Vigan, tumultulong a mangyad-adal ken mangiwarwaras iti daytoy a pagpakan kadagiti lames, a malaksid iti mapamindua a kadagsen dagiti lames iti uneg laeng ti sumagmamano a bulan, makatulong pay ti nasao a feeds a mangpalit-aw iti danum ken mangsaluad kadagiti pagit-itlogan ken ayuyang dagiti dadduma pay a lames.

Maipalagip nga inrubuat ni Congressman Singson ti panagited kadagiti nasao a pagpakan kadagiti pupokan ken fish cages idiay Villamar, Caoayan a nakapaneknekan iti napaadu a nakalapan dagiti agtartaraken iti bangus ken tilapia iti uneg laeng ti ababa a panawen.

Manamnama nga agsaknapton kadagiti sangapulo ket maysa nga ili iti umuna a distrito ti Ilocos Sur daytoy a paset ti food security program ni Diputado Singson. Iti agdama, adu metten a kabangibang nga ili ti nangipasimudaag iti interesda iti daytoy a proyekto.

Ni Dip. Ryan Singson ti 1st Dist., Ilocos Sur (tengnga) bayat ti pannakaipakita kadagiti agtartaraken iti lames iti napintas a kalidad ti baro a pagpakan kadagiti lames a maibumbunong ita kadagiti adda piskariana iti probinsia.

(Naipablaak iti Bannawag, Mayo 21, 2012 a bilang.)