May 3, 2012

‘Traditional Job Creator’ a kurso, naipaganetget


Maibatay iti Departament of Labor and Employment (DOLE) ken iti maysa a panagadal a napauluan iti “Project Jobfits 2012,” ti services sector ti agbalinto a kangrunaan nga agparnuay iti adu a pagtrabahuan iti nagbaetan dagiti tawen 2012 ken 2020.

Ngarud, maigunamgunam koma kadagiti nagannak a pangalaenda dagiti annakda kadagiti kurso a mainaig iti services sector a makuna a ‘traditional job creator.’

Daytoy ti imbalakad ni Senate Minority Alan Peter Cayetano kadagiti nagannak itay lawasna iti pananginterbiu kenkuana dagiti agiwarwarnak idinto a kinunana a nasken daytoy tapno maipanamnama ti kaadda ti trabaho a maserkanto dagiti annakda apaman a makaturposda.

Kinuna ti senador a maibilang kadagiti kurso a mainaig iti services sector dagiti sumaganad: cyberservices, health and wellness, tourism, banking and finance, transportation and logistics, ken wholesale and retail trade.

Kinunana nga intudo pay ti DOLE ti agribusiness ken panagminas a kas paggapuan ti adu a trabaho.

Innayonna a ti panagenrol kadagiti kurso a sobra ti kinaadun ti graduadona a kas iti nursing, education ken criminology, pakaruenna laeng ti parikut iti kaawan iti pagtrabahuan gapu iti panagiinnagaw dagiti umad-adu a graduado kadagitoy a kurso kadagiti adda a pagtrabahuan.

 (Naipablaak iti Bannawag, Mayo 14, 2012 a bilang.)

No comments:

Post a Comment