Dr. Nolasco ti UP-Diliman, Atty. Luis ti KWF, agsarita iti komperensia ti GUMIL

Naawis ni Dr. Ricardo Ma. Duran Nolasco, Propesor iti College of Linguistics iti Unibersidad ti Filipinas iti Diliman, Quezon City, a kas keynote speaker iti umuna nga aldaw ti Maika-44 a Komperensia Nasional ken Literary Seminar-Workshop ti GUMIL Filipinas a maangay itoy nga Abril 20-22 iti Don Mariano Marcos Memorial State University iti Bacnotan, La Union.

Dati a Commissioner ti Komisyon sa Wikang Filipino (KWF), sagidento ni Dr. Nolasco iti bitlana ti tema ti komperensia “Ni Mannurat a kas Mannursuro.”

Kadua ni Dr. Nolasco a naawis nga agsarita ni Atty. Concepcion H. Luis, agdama a Commissioner para iti lengguahe nga Ilokano iti KWF nga agsaritanto met iti “Rabii ti Kultura” iti maikadua nga aldaw ti komperensia.

Iti panglukat a programa a maawagan iti “Rabii ti Pammadayaw,” mapadayawanto ni Dr Paul Blanco Zafaralla a kas Pedro Bucaneg Awardee ita a tawen. Mayalnato pay ti kaudian a sinuratna a libro, ti Dr. Godofredo S. Reyes: The Pride of Ilocandia a saksianto ni Dr. Dedicacion Agatep-Reyes, 1993 Leona Florentino Awardee ken kaingungot daydi Dr. G.S. Reyes.

Iti maikadua nga aldaw ti komperensia (“Aldaw ti Literatura”), agpaay met ni retirado nga RTC Judge Joven F. Costales a kas guest speaker iti bigat. Ni Costales ti umuna a presidente ti GUMIL La Union (1966-67) ken nagtakem pay a Sekretario-Heneral ti GF idi 1993-95.

Iti karabiyanna, “Rabii ti Kultura,” nga agpaay a kas naisangayan a sangaili ken agbitla ni KWF Commissioner Concepcion H. Luis. (Djuna R. Alcantara)

(Naipablaak iti Bannawag, Abril 23, 2012 a bilang.)