December 19, 2011

Manipud iti Editor

Apay a Siak?

NASUROK a dua ribu a tawen itan ti napalabas, idiay Langit, pinaawagan ni Apo Dios dagiti anghelna.

“Pinaawagankayo gapu iti dakkel a problema,” kinuna ti Apo.

“Ania dayta, Apo?” sinaludsod ti maysa nga anghel.

“Idiay Daga, nakaroda unayen! Kayatkon nga ungawen ti lubong ngem inkarik idin a saankon nga uliten ti inaramidko idi panawen ni Noah.”

“Ania ngarud ti kayatyo a maaramid, Apo?” sinaludsod ti sabali nga anghel.

“Mangipatulodak iti mapan idiay Daga a maipasngay ken agbiag a kas tao; iti kasta, adda mangbayabay kadakuada a mapan iti nalinteg a dalan wenno ‘matuwid na daan’ tapno maisalakanda.”

“Ket asino, Apo, ti ipatulodyo?” kinuna ti maysa nga anghel a medio madanagan. No isu ti itudo ti Apo a maipatulod iti Daga, aramidenna ti amin tapno agrason. Dina la ketdi kayat ti mapan idiay Daga a nagpupuniponan ti kinadakes. Ngamin, no agbalin a tao, malabusan iti pannakabalin ket dina la ketdi ammo ti mapasamak kenkuana. Saan laeng a malabusan iti pannakabalin, nalakanto pay a masulisog, agpungtot, gumura, agladingit a kas met laeng iti tao. Ah, dina la ketdi kayat ti kasta!

Maysa pay, nakaad-adayo ti Daga! Adda daytoy iti nakad-adayo a paset ti mangliwengliweng nga Uniberso, maysa a bassit a rinet iti igid ti kunkunada nga Ariwanas wenno Milky Way.

Ket inur-uray daytoy nga anghel, kasta met dagiti dadduma pay nga anghel, no asino ti itudo ti Apo nga ipatulodna a mapan idiay Daga.

Ket timmakder ti Apo iti ulo ti lamisaan a pangmitmitinganna kadagiti anghel, napan iti abay ti atiddog ken nalawa a tawa sa kinunana kadagiti anghelna: “Umaykayo amin ditoy!”

Ket masmasdaaw dagiti anghel a nagtungpal.

Ket kinuna ti Apo: “Makitayo no asino daydiay?” Intudona iti ruar, iti ‘yan ti maysa nga agkabannuag a madama nga agprakpraktis nga agay-ayam iti golf iti nalawa a hardin ti Palasio ti langit. Dagiti kerubim ti caddy-na.

Ni bossing da a Jesus!

Napa-aahhh! dagiti anghel iti pannakaangesda iti nalukay ta ngamin, isuda amin, ay, dida la ketdi kayat ti maipatulod iti Daga. Napa-aahh!-da pay ta dida mamati a mayat met ni Jesus a mapan idiay Daga. Ken napa-aahhh!-da pay ta kasla dida mamati nga ipatulod ti Apo ti kakaisuna nga anakna iti Daga a nagpupuniponan ti kinadakes.

Ngem idi nagnadnad, kinuna met laeng dagiti anghel, ta nakaisigudanda la ket ngarud ti kinasingpetda: “Apo, pumilika kad’ la kadakamin iti maysa; saan a ni Bossing Jesus a kakaisuna nga anakmo!”

“Nakaikeddengakon,” kinuna ti Apo. “Ni Jesus ti ipatulodko.”

“Ngem, Apo, apay pay la ngarud nga inayabannakami no nakaikeddengka met la gayamen?” nakuna ti maysa ngem napatilmon iti dakkel idi maamirisna ti kasdiay a sinaona iti boss-na.

“Inayabankayo, saan a gapu ta kayatko a tulongandak nga agdesision,” kinuna ti Apo; nakatallikud dagiti imana; naannad ti pannagnana a nanglikawlikaw iti nagtimbukel a lamisaan a napan manen nagtugawan dagiti anghel. “Ngem inayabankayo ta iti daytoy a kanito, kayatko nga andingayendak; anian a nagdagsen ti barukongko ta ti mismo nga anakko ti ipatulodko iti ayan dagiti managdakdakes a tattao. Ammok lattan no anianto ti mapasamak iti anakko. Ilansadanto iti krus!”

Limmabba ti ulo dagiti anghel iti dayta a nangngegda. Anak ti Dios, ilansa laeng dagiti tattao! Di nakarkaron no isuda? Anian a nagdangkok dagiti tattao.

Ket ngarud, dimteng ti kanito nga inayabanda ni Jesus iti sango ti Apo ken dagiti anghelna. Ket manen, imbaga ti Apo ti desisionna ken ni Jesus --a napakigtotan met la unay.

“Ngem, Daddy! Apay a siak?” kinuna ni Jesus a napatakder pay. “Apay a siak, Daddy?” inulitna. “Nagadu a sabali! Maysa a Mission Impossible daytoy!”

“Apay a sika?” imbales ti Apo ngem iti naamaan a timek. “Ket asino ngarud?”

Saan a nakatimek ni Jesus. Wen nga agpayso, asino ngarud?

Inam-amiris ni Jesus ti sinao ti amana. No saan nga isu ti mapan idiay Daga, asino ngarud? No saan nga isu ti mapan a mayanak ken agbiag a kas tao ken mangiwanwan kadagiti tattao, asino ngarud? Saan la ketdi a mabalin a ti Amana ti mapan ta lumakay metten.

Ket no saan nga isuna ti mapan, maysa ngarud kadagiti anghel ti mapan—maysa kadagiti anghel a pasurotna laeng. Ket no isuna nga anak ti Dios, agamak a mapan idiay Daga, di nakarkaron ti maysa nga anghel nga adayo a nakapkapsut ngem isuna? A nakurkurang ti ammona ngem isuna?

Ala, wen, mabalin nga ipakita ti anghel ti turedna ket umannugot a mapan idiay Daga, nga isakripisiona ti biagna maisalakan laeng ti tao—ngem isu nga anak ti Dios, saanna kadi a maaramid dayta?

Ania ngarud ti serbina a kas anak ti Dios no saan nga isu ti umaddang nga agpasango tapno situtured a mangibaga: “Wen, Ama, matungpal ti pagayatam.” Ket iti kasta, agbalin a pagwadan dagiti nababbaba ngem isuna?

Ket kasta ngarud ti inaramid ni Jesus. Timmakder ket sinangona dagiti anghel sa ti amana, kalpasanna ket kinunana a napnuan-talged: “Wen, Ama, matungpal ti pagayatam.”

Ket kasta a napasamak ti immuna a Paskua. Dimteng ni Jesus a kas maysa a maladaga. Nagbiag a kas tao, nariknana amin a rikna a dumteng iti maysa a tao, ngem saanna a nalipatan ti nakaibaonanna a mision. Impatungpalna uray ania ti mapaspasamak, uray mapabpabainan, uray malalais —uray pay mailansa iti krus—a kas iti napagtengna.

Ngem iti pannakailansana iti krus, adda imbatina a bukel—maysa nga idea, maysa a kapampanunotan-- a nagtubo, nagrangpaya, nga agingga ita, isu ti kangrunaan nga “ismo” iti lubong—ti Kristianismo.

Datayo, no adda maipakumit nga iti panangipagaruptayo a narigat a trabaho a mangagaw pay iti orastayo, gagangay met a masaludsodtayo: Apay a siak?

Ngem kas iti pannakaitudo ni Jesus (itoy estoriatayo) a mangibanag iti maysa a mision, kasta met laeng ti pannakaitudotayo a mangipatungpal iti ania man nga akemtayo iti daytoy a biag—maysaka man a gagangay nga agtagibalay wenno presidente ti pagilian ta datayo la ngarud ti nakaitalkan dayta a pagrebbengan. Annongem ti naited kenka a pagrebbengan iti amin a kabaelan—uray pay mailansaka. Ket addanto la ketdi maibatim a bukel nga agtubo ken agrangpaya—uray kasanot’ kabassitna, nasaysayaat ngem ‘tay awan, di ngamin?

Naragsak a Paskuayo amin!

--CLES B. RAMBAUD

(Naipablaak iti Bannawag, Disiembre 26, 2011 a bilang.)

No comments:

Post a Comment