Kapipintasan a Pelikula Kadagiti Rehion, Mabuya iti Philippine Arts Festival 2012

Di Pay Naluto, Naibusen
Ni ANGELO 'ELOY' PADUA

Kapipintasan a Pelikula Kadagiti Rehion,
Mabuya iti Philippine Arts Festival 2012


NO Pebrero ti mangngegmo, ania ti mapanunotmo, ‘bagis?

Siempre, ayat, aya? Bulan ni ayat. Valentino-Valentina.

Ngem kadagiti adipen ti arte, daytoy ti tiempo ti arte iti Filipinas.

Iwayat manen, ‘bagis, ti National Commission for Culture and the Arts (NCCA) ti Cinema Rehiyon.

Maysa daytoy a festival dagiti pelikula, ‘bagis. Ngem saan a kasla Metro Manila Film Festival daytoy. Saan a salip. Ketdi, panangipabuya kadagiti kapipintasan a pelikula kadagiti rehion.

Kinapudnona, maikapat daytoyen a Cinema Rehiyon, ‘bagis. Ket itoy a gundaway, maangay iti Bacolod City, Negros Occidental.

* * *

Panggep ti nasao a festival ti mangipaay kadagiti apagsulbod a filmmaker kadagiti rehion a mangipakita iti naidumduma a kultura babaen dagiti pelikula a ti estoriada, agindurog kadagiti rehion ken nausar ti bukodda a lengguahe, maysa a baro a wagas ti panagipelikula gapu ta dagiti agdudupudop itan nga indie films addaandan iti pormula— naala kadagiti nasipnget nga eskinita, ken mariprippuog a pasdek iti siudad a nagnunog kadagiti tema kas iti kinakurapay ken seks.

Di ketdin baro ken naidumduma dayta, ‘bagis?

* * *

Kinapudnona, maysa ti Cinema Rehiyon kadagiti pito a kangrunaan a proyekto ti Philippine Arts Festival 2011 (PAF).

Idauluan ni Dr. Miguel Rapatan, maiwayat daytoy iti Pebrero 8 agingga iti 11, 2012.

Maipabuya ditoy dagiti abbaba ken full-length a pelikula manipud kadagiti rehion. Dagiti mapili kadagitoy, maipabuyada manen iti tampok nga aldaw ti festival. Addanto dagiti forum ken panagpapatang sakbay ti film festival.

Daytoy met a festival ti nangtignay kadagiti rehion a mangirugi met iti bukodda a a tignay iti panagipelikula. Mairaman ditoy ti Bacolod, Baguio, Cagayan de Oro, CALABARZON, Cebu, Davao, Pampanga, Samar, Western Mindanao.

Kaaduan kadagitoy a grupo, ‘bagis, ti sinupsuportaranen ti NCCA.

* * *

No madlawmo, ‘bagis, malaksid iti Baguio, awanen ti Kailokuan iti listaan.

Ay, agkutikuti koma ngaruden dagiti filmmaker nga Ilokano.

Ngem agurayka, adda kadi Ilokano a filmmaker itay?

* * *

Kunada man, ‘bagis, nga iti daytoy a festival ti pangsirpatan no ania ti masakbayan ti pelikula iti pagilian. Kayatda a mapaneknekan a malaksid iti naidumduma nga idiayada, adda kadi met laeng gunggona a maagsaw— adal ken pinansial.

Gundawayan koma ngarud dagiti Ilokano a naayat iti pelikula. Nangruna kadagiti agsirsirpat iti pagbakasionanna. Ta nakabakasionka la ngaruden, nakabuyaka pay kadagiti dekalidad a pelikula.

* * *

Tunggal Pebrero a maiwayat daytoy PAF, ‘bagis, kas paset ti National Arts Month kas mayataday iti Presidential Proclamation No. 683 a napirmaan idi 1991.

Agtaray daytoy iti sibubukel a Pebrero ket idauluan ti NCCA nga ipanguluan met da Chairman Felipe de Leon Jr. ken OIC-executive director Adelina Suemith.

Iti selebrasion itoy umay a tawen, agwerret iti tema a “Tradisyon at Inobasyon” (Tradition and Innovation) nga agpanggep nga ad-adda pay a mangital-o iti kinamanagpatuat dagiti adipen ti arte a kakailian.

Siempre, ‘bagis, addanto met dagiti ganggannaet nga adipen ti arte tapno mangibinglayda met iti ammoda, ken mangadawda met iti sirib iti nakabakbaknang nga arte ti Filipinas.—O

(Naipablaak iti Bannawag, Disiembre 5, 2011 a bilang.)