November 10, 2011

Ama, nagasidegen!


Ti asteroid a napanaganan iti 2005 YU55 nga insiwet a nanglabas iti Daga idi Nobiembre 9, kas inladawan ti maysa a dibuhista. Kas kadakkel ti bapor nga agkarkarga kadagiti pakigubat nga eroplano ti nasao a bato-iti-law-ang. (AP)




Maysa nga asteroid a kas kadakkel ti aircraft carrier ti insiwet a nanglabas iti Daga idi Mierkoles, Nobiembre 9 (oras iti Filipinas) iti distansia a kaasitganen iti uneg ti 35 a tawen.

Am-ammo ti asteroid iti naganna a 2005 YU55, natakuatan ti kaadda daytoy idi 2005 ken sinagsaganaan dagiti sientista ti ilalabasna iti Daga kalpasan ti panangkarkuloda no kasano ti kaadayo ti asteroid iti kanito a lumabas iti Daga.

Mapan a sumurok-kumurang a 325,088 a kilometro ti kaadayo ti asteroid iti Daga iti ilalabas daytoy wenno adda iti nagbaetan ti pagrikrikusan ti Daga ken ti Bulan ta mapan laeng met a sumurok-kumurang a 384,633 a kilometro ti nagbaetan ti Daga ken ti Bulan.

Kuna dagiti sientista iti Deep Space Network ti NASA nga agpegges daytoy apagkapat-ti-milia ti kadakkelna nga asteroid iti 46,671 kilometro kada oras. No dinungparna koma ti Daga, nangbukual iti abut a 6.4 kilometro ti diametrona ken aguneg iti nasurok a kagudua ti kilometro. No met iti taaw ti nakaitamaanna, nangigubuay koma iti 21 metro ti kangatona a dalluyon.

Kuna ti NASA a mapasamakto manen ti kastoy ti kaasidegna nga ilalabas ti maysa nga asteroid iti Daga inton 2028.

Mapapati a dagiti asteroid ti sobra iti pannakaparnuay ti solar system (ti init ken dagiti planetana) 4.5 bilion a tawenen ti napalabas.

Adu ti kakastoy a kasla bato a bantay iti law-ang nga insiwet ti kapardasda ket amken dagiti sientista nga iti masakbayan, addanto kastoy a mangdungpar iti Daga.

Adda teoria a maysa a dakkel nga asteroid ti nangdungpar iti Daga iti adayon a napalabas a nakaigapu iti pannakaungaw dagiti dinosaur.


(Naipablaak iti Bannawawag, Nobiembre 21, 2011 a bilang)

No comments:

Post a Comment