Nasken a maadal a nasayaat ti singasing a pannakayakar ti panaglukat dagiti klase manipud iti Hunio iti Setiembre, kas kinuna ni Education Secretary Armin Luistro.
Mainaig daytoy iti napabaro a kiddaw a pannakayakar ti panaglukat dagiti klase gapu met laeng iti pannakakansela dagiti klase iti elementaria ken haiskul iti Kamanilaan iti umuna pay laeng a lawas ti klase kalpasan ti panagtudona iti napigsa a nangibunga met iti pannakalayus ti sumagmamano a lugar iti Kamanilaan ken kabangibangna a lugar.
Kuna dagiti mangyen-endorso iti pannakayakar ti panaglukat dagiti klase a gagangay a panawen ti bagyo iti Filipinas iti Hulio ken Agosto ngarud rumbeng laeng a mangrugi koma ti klase iti Setiembre ken aggibus iti Hunio tapno mailiklik dagiti ubbing iti peligro nga ibunga ti kinadakes ti panawen.
Nupay kasta, naammuan a maibatay iti immunan a surbey nga inwayat ti DepEd, ad-adu ti pabor a mapagtalinaed ti Hunio a kas panaglukat dagiti klase ta gagangay a ti met laeng Kamanilaan ken sumagmamano a paset ti Luzon ti malaylayus iti panawen ti tudtudo.
Maysa pay, gagangay pay a maang-angay dagiti piesta iti Abril ken Mayo; ngarud, mabalin a maapektaran dagiti klase no maisanud ti panaglukat dagiti klase ta karaman no kuan a panawen ti panageskuela ti Abril ken Mayo.
(Bannawag, Hunio 30, 2011, panid 38.)
No comments:
Post a Comment