June 14, 2011

Awan diborsiotayo, dayaw ti Filipinas, kuna ‘toy arsobispo

Maysa a dakkel a dayaw para iti Filipinas ti kinapudno a daytoy laengen a pagilian iti lubong ti kakaisuna nga awanan iti linteg a mangipalubos iti diborsio.

Daytoy ti kinuna ni Lingayen-Dagupan Archbishop Oscar Cruz, dati a pangulo ti Catholic Bishops’ Conference of the Philippines (CBCP).Segun ken ni Cruz, imbes nga itandudo ti diborsio, rebbengna koma pay ketdi nga ipagpannakkel dagiti Filipino nga awan ti diborsio iti pagilian.

Segun iti arsobispo, kayatna a sawen a nagtalinaed latta kadagiti Filipino ti panangipateg iti pamilia, nga isu met ti “cultural identity” ti Filipinas.

Impaganetget pay ni Cruz a ti kinairut ti panagtitipkel ti pamilia Filipino ti am-ammo iti sangalubongan, ket rebbengna laeng ngarud a pagtalinaeden daytoy.

Malaksid iti estado ti Vatican City, ti laengen Filipinas ti kakaisuna a pagilian iti lubong nga awanan iti linteg iti diborsio, kalpasan a nagbalin a legal itay nabiit ti diborsio iti Malta, a maysa met a Katoliko a pagilian.

Bannawag, Hunio 20, 2011, panid 38.

No comments:

Post a Comment