Lektiur iti ortograpia Ilokana, mairaman iti komperensia ti GF

Maysa kadagiti makaay-ayo a topiko a maikkanto iti importansia iti Maika-44 a Komperensia Nasional ken Literary Seminar-Workshop ti GUMIL Filipinas inton Abril 20-22, 2012 iti Don Mariano Marcos Memorial State University North La Union Campus (DMMMSU-NLUC) iti Bacnotan, La Union, ti Ortograpia Ilokana a pakawarwaranto met ti tema ti komperensia a “Ni Mannurat a kas Mannursuro.”

Pagtinnulonganto a tamingen da Editor ti Bannawag Cles B. Rambaud ken premiado a mannurat Sherma Benosa ti topiko iti ortograpia ti lengguahe nga Ilokano (a maaw-awagan pay iti Iloko wenno Iluko) iti panirigan ti maysa a mannurat ken lingguista, a kas panagsaganad dagiti lektiurer.

Malaksid itoy, mayadalto met ti panagsurat iti daniw, salaysay, sarita, ken ababa a nobela. Ni Palanca Hall of Famer Reynaldo A. Duque ti napusgan nga aglektiur iti daniw para kadagiti beterano; ni Poetry Editor ti Bannawag Ariel S. Tabag para kadagiti agdadamo, ken Johmar Alvarez (daniw a para kadagiti ubbing).

Ni met Manuel S. Diaz ti aglektiur iti sarita para kadagiti beterano idinto a ni Literary Editor ti Bannawag Juan Al. Asuncion ti mangtamingmo iti panagsurat iti sarita para kadagiti agdadamo a mannurat.

Tamingento met ni dati a Literary Editor ti Bannawag Jose A. Bragado ti panagsurat iti salaysay; ni met dati a Managing Editor ti Bannawag Juan S.P. Hidalgo, Jr. ti aglektiur iti ababa a nobela.

Addanto pay lektiur maipapan iti copyright a pagsaritaan ni Bebang Sy, eksperto iti daytoy a tay-ak.

Para iti nayon nga impormasion mainaig iti komperensia, umawag/ag-text iti 0949-3431766. (Djuna R. Alcantara)

(Naipablaak iti Bannawag, Abril 9, 2012 a bilang.)