Dacuag, Umuna iti salip iti Daniw ti 3rd Gabriela Prize

Indauluan ni Pearl Lovedyn A. Dacuag ti Union, Gamu, Isabela dagiti nangabak iti Salip iti Daniw ti Maikatlo a Gabriela Prize/Premio Gabriela (2020). 

Iti 31 a daniw a naisalip, ti daniw ni Pearl a “Darudar” ti nakagun-od iti Umuna a Gunggona. Nagturpos iti B.A. Communication iti UP Baguio, nagtrabaho ni PLAD iti Bombo Radyo Philippines iti agarup 10 a tawen ken iti agdama, agpapaay iti Department of Agriculture (DA)-Region I iti San Fernando City, La Union. Fellow iti Daniw iti 3rd Pasnaan Literary Worshop ti GUMIL Filipinas idi 2012. 

Ni Oswald A. Valente ti Comcomloong, Currimao, Ilocos Norte ti nangyalat iti Maikadua a Gunggona babaen ti daniwna a “Sika ken Siak: Naglapunosan.” Premiado a mannaniw ken maysa a mannalon, nagpaay pay ni OAV a kapitan ti barangay iti lugarda, ken preacher, teacher, exorter iti nakaikappenganna a pammati. 

Ti Maikatlo a Gunggona, inyalat ni Daniel L. Nesperos ti San Lorenzo, San Nicolas, Ilocos Norte, babaen ti daniwna nga “Asin.” Premiado a mannaniw ken piksionista ni DLN, autor ti Anglem, koleksion dagiti daniw. Agpapay iti agdama a sekretario ti barangayda ken maysa kadagiti learning resource reviewer/editor dagiti libro nga Ilokano ti Department of Education (DepEd). 

Nairaman a kas finalist dagiti daniw a “Dallot ti Iliw ken Saan a Napakpakadaan nga Idadanon” ni Deo M. Ramos ti Bangued, Abra; “Sapsapulek Daydi Banglom” ni Rodel Ringor Estacio ti Rosario, La Union, ken “Tedted ti Linnaaw” ni Marites Viesca Roque ti Tuao, Cagayan. 

Dagiti nagpaay a hurado: Dr. Sonja Albano Chan, mannaniw iti Ilokano ken Ingles, propesora iti literatura, linguistics, ken foreign languages iti nadumaduma nga unibersidad iti Baguio City, ken autor ti Listen Dear Heart/ Umarasaas ‘Tay Rikna a nakaurnongan dagiti daniwna; 

Hermilinda T. Lingbaoan-Bulong, mannaniw, mannalaysay, piksionista iti Ilokano, Tagalog, ken Ingles, kakaisuna a babai a nagbalin a kameng ti editorial ti Bannawag, pinadayawan ti Unyon ng mga Manunulat sa Pilipinas (UMPIL) iti Gawad Pambansang Alagad ni Balagtas for Ilokano Fiction idi 2016, autor ti nailibro a nobela a Kalinawa, ken editor ita iti UP Press; 

ken Ria Rebolledo, mannaniw iti Ilokano ken Ingles, piksionista, autor ti Tagidpuan a chapbook ti dandaniw, ken writer/editor dagiti learning materials iti maysa a Korean online tutorial academy iti Baguio City. 

Ti Imnas & Iway Publications, maysa nga independiente nga small press nga agiprodprodius ken agipabpablaak kadagiti zine, chapbook, ken libro nga Ilokano, ti mangtartarawidwid iti Gabriela Prize wenno Premio Gabriela. (RVA)

(Naipablaak iti Bannawag iti Oktubre 1-15, 2020 a bilang.

Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com.

Para iti digital a kopia, mapan iti MAGZTER wenno PRESS READER ket sapulen ti Bannawag.

Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)