Dap-ayan 2020 ti GUMIL Filipinas, maangay iti Siudad ti Batac

Maangay ti Dap-ayan 2020, wenno ti tinawen a kombension ken literary seminar ti GUMIL Filipinas (GF), inton Abril 17-19, 2020 iti National Tobacco Administration (NTA) Building iti Tabug, Siudad ti Batac, Ilocos Norte, babaen ti panangsangaili ti GUMIL Ilocos Norte. Saanen nga iti Currimao, a kas iti immun-una a naipadamag.

Daytoy ti napagnunumuan iti Special Board Meeting dagiti opisial ti GF, ti gunglo dagiti mannurat nga Ilokano iti Filipinas ken iti ballasiw-taaw, a naangay idi Enero 18 iti pagtaengan ni mannurat ti Bannawag Norberto D. Bumanglag, Jr. iti Brgy. 7, San Nicolas Ilocos Norte.

Panggep ti tinawen a kombension ti mangisayangkat kadagiti lektiur ken workshop iti panagsurat iti daniw, piksion, ken salaysay kadagiti mannurat a kameng ti GUMIL, dagiti mannursuro, estudiante ken asino man nga interesado nga agadal nga agsurat. Mainayon iti lektiur dagiti maidatagto a sukisok (researches) mainaig iti kultura, pakasaritaan, wenno iti pagsasao nga Ilokano manipud kadagiti researchers kadagiti unibersidad.

Paset met ti pasken ti pannakarambak ti maika-52 a tawen ti GUMIL babaen ti espesial a programa para iti cultural presentation, pannakaipaay ti premio kadagiti nangabak kadagiti salip iti panagsurat, pannakaipaay iti Pedro Bucaneg ken Leona Florentino Awards, ken pannakayalnag dagiti libro iti Ilokano a sinurat dagiti  kameng ti gunglo.

Agbayad ti tunggal delegado iti Dap-ayan iti P1,500 para iti seminar kit ken para iti akomodasion ken makan iti tallo nga aldaw a pasken. Kadagiti interesado nga agatendar, mabalinda ti umasideg kadagiti provincial chapter iti lugarda, wenno mnabalinda ti agsurat itoy nga email address: nmevaldez@gmail.com. Maibalakad met ti panangbisita iti FB page ti GUMIL Filipinas para kadagiti sumarsuruno nga anunsio mainaig iti Dap-ayan 2020. (NMEV)


(Naipablaak iti Pebrero 16-29, 2020 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)