Manamnama ti naparpartak a panagdur-as ti Filipinas ngem dagiti kakaarrubana a pagilian iti Asia a pakairamanan dagiti nabibileg ti ekonomiana a kas iti China ken Malaysia bayat ti nabatbati a kagudua ti termino ti administrasion ni Presidente Duterte.
Daytoy ti kinuna ti Department of Finance (DOH) kalpasan ti panangipakaammo ti World Bank a gapu kadagiti natibker a macroeconomic fundamentals ti gobierno ti Filipinas ken iti agtultuloy a pannakayimplimentar dagiti reporma iti buis ken panaggastos ti gobierno, manamnama met ti naparpartak nga irarang-ayna.
Kinuna ni Finance Undersecretary Gil Beltran a naibatay ti kinuna ti World Bank iti natibker a pannakilangen ti Filipinas kadagiti sabsabali a nasion.
Innayonna a manamnama nga agtalinaed ti Filipinas a makakayaw kadagiti foreign direct investments (FDIs) malaksid nga ikagkagumaananda ti ad-adda pay a nawaywaya a panagnegosio iti pagilian.
Dinakamat pay ni Beltran ti naaramidan ti pagilian mainaig iti panaggastos ken iti reporma iti buis a napigsa a mangsupsuportar iti programa ni Duterte a “Build, Build, Build” wenno iti modernisasion iti impraestruktura.
Kinuna ni Beltran a sirsirmataen ti World Bank a mapan a 6.4 a porsiento ti gross domestic product (GDP) ti Filipinas iti daytoy a tawen, maikadua iti 6.6 a porsiento ti Vietnam, ken nangatngato ngem iti China nga addaan iti 6.2 a porsiento, Indonesia (5.2 porsiento), ken Malaysia (4.6 porsiento).
(Naipablaak manen iti Hulio 1-15, 2019 a bilang ti Bannawag. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment