Salip iti Daniw ti 2nd Gabriela Prize, naluktan

Naluktan ti Maikadua a Gabriela Prize (Premio Gabriela) babaen ti Salip iti Daniw iti panggep a mangtakuat iti kabarbaro wenno naiduma a daniw iti Ilokano.

Pagalagadan ti Salip:

1. Silulukat ti salip kadagiti amin nga agsursurat iti daniw nga Ilokano. Narugian ti salip idi Abril 2, 2019 ken maigibus inton Agosto 30, 2019 (aldaw ti pannakaipakaammo iti publiko kadagiti nangabak ken pannakaited dagiti premioda). Tarawidwidan daytoy ti Imnas & Iway Publications, maysa nga independiente nga small press nga agipabpablaak iti zines, chapbooks, ken libro nga Ilokano.

2. Maysa a daniw laeng ti pakisalip. Nawaya ti mannaniw iti kayatna a tema, porma, ken kaatiddog wenno kaababa ti isalipna a daniw. Maisingasing ti panagtakuat kadagiti sabali pay a porma ken linaon ti daniw. Mabalin ti agidatag kadagiti experimental a daniw.

3. Orihinal ken bukod a putar ti mannurat ti daniwna. Masapul a di pay naipablaak wenno di pay naiposte a publiko iti web ken social media, ti pakisalip. Ti matakuatan a nagsakar (no nangabak), maibabawi ti premiona ket dinton mapalubosan a makisalip iti Gabriela Prize ken iti ania man a pasalip nga iwayat ti Imnas & Iway Publications.

4. Deadline ti panagidatag iti pakisalip: Hulio 15, 2019. Ipatulod kas file attachment (MS Word wenno PDF) iti gabriela.prize@gmail.com iti subject a “2nd Gabriela Prize.” Saan nga ilanad ti nagan wenno parbo a nagan iti pakisalip. Mangipakuyog iti text file a nakailanadan ti pudno ken kompleto a nagan, numero ti selpon, email address, link ti FB account, adres ti pagtaengan/opisina, ken bionote.

5. Dagiti gunggona: Umuna a Premio: PhP1,500; Maikadua: PhP1,000; ken Maikatlo: PhP500; ken sertipiko. Mapadayawanto met iti Hall of Fame ti mannurat a mangabak iti lima nga Umuna a Premio. Mabalin a makissayan wenno manayonan dagiti magunggonaan no ikeddeng dagiti hurado. Saan met a mabaliwan ti pangngeddeng dagiti hurado malaksid no adda nangabak a naglabsing.

6. Maipakaammo iti publiko ti kinaasino dagiti nangabak inton Agosto 30, 2019. Virtual ti awarding ngem maipatulodto ti gunggona dagiti nangabak babaen ti courier.

Para iti dadduma pay nga impormasion, agsurat iti gabriela.prize@gmail.com wenno ag-PM iti FB page ti Imnas & Iway Publications iti fb.com/ImnasIwayPublications.


(Naipablaak iti Mayo 13, 2019 a bilang ti Bannawag. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)