Inyalat ni Daniel L. Nesperos ti Umuna a Gunggona ti 4th Saniata Prize Salip iti Daniw babaen ti daniwna a “Ti Milagro.” Premiado a mannaniw ken piksionista ken tubo iti San Nicolas, Ilocos Norte, daytoy ti maikatlo nga umuna a gunggona a nayalat ni Nesperos manipud iti nasao a pasalip ket ngarud, maipaay pay kenkuana ti Hall of Fame a pammadayaw. Umawat daytoy iti medalion, sertipiko ti pammadayaw, ken kuarta a Php2,500.00; ken plake, kas Hall of Fame awardee.
Inyalat met ni Prodie Gar. Padios ti Maikadua a Gunggona babaen ti daniwna nga “An-annong.” Premiado a mannaniw ken piksionista, tubo iti Santa Teresita, Cagayan ni Padios ngem agnaeden ken ti pamiliana iti Red Deer, Alberta, Canada. Umawat daytoy iti sertipiko ti pammadayaw ken kuarta a Php 2,000.
Inyalat met ni Mighty C. Rasing ti Maikatlo a Gunggona babaen ti daniwna a “Tawid.” Premiado a mannaniw ken piksionista ken kolumnista iti Bannawag, tubo iti San Manuel, Isabela ni Rasing ngem agnaeden ken ti pamiliana iti Nashville, Tennessee iti Estados Unidos ti Amerika. Umawat daytoy iti sertipiko ti pammadayaw ken kuarta a Php1,500.00.
Nagserbi a hurado da Bannawag Editor Cles B. Rambaud (pangulo), UP Press Editor Linda T. Lingbaoan-Bulong (kameng), ken UP Baguio Professor Junley L. Lazaga (kameng).
Isponsoran ti Saniata Publications nga imatonan ti Pamilia Tabag, panggep ti Saniata Prize a tignayen dagiti mannaniw nga Ilokano nga agtultuloy a mangparnuay kadagiti napipintek a daniw a nasurat iti lengguahe nga Ilokano.
(Naipablaak iti Pebrero 4, 2019 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment