Iti baet dagiti reklamo kontra iti free higher education law, kinuna ni Commission on Higher Education (CHED) Chairman J. Prospero De Vera III itay nabiit a naannayasen a maipakpakat ti Republic Act 10931.
Sungbat ni De Vera daytoy iti panangdillaw ni Diputado ti Albay Joey Salceda nga “estupido” ti pannakayimplementar ti linteg iti libre nga edukasion iti kolehio, karaman ti nabuntog a pannakaited ti naibadiet a gastuen dagiti unibersidad ken kolehio.
Inlawlawag ni De Vera, a dadaulo met laeng iti pannakayimplementar ti Unified Student Financial Assistance System for Tertiary Education (UniFAST), a maibatay iti rekord ti CHED-UniFAST, a ti 62 nga SUC ken dagiti lokal nga unibersidad ken kolehio (LUC) a bigbigen ti CHED, nakompletodan ti panangidatagda iti listaan ti singirenda iti gobierno agingga iti Oktubre 2018 nga aggatad iti P3,227,556,829.30.
Innayon ni De Vera a naisubli metten ti CHED-UniFAST ti pondo iti AY 2017-2018, iti babaen ti programa nga P8B Free Tuition 2017.
Kuna ni De Vera a nasayaat ti panangisayangkatda iti free higher education law iti 2017 isu a kabaelanda met laeng ti naannayas a pannakaisayangkat daytoy iti 2018.
(Naipablaak iti Bannawag iti bilang a Disiembre 10, 2018. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment