Inggunamgunam daytoy ni Labor Secretary Silvestre Bello III babaen ti panangipaulogna iti Labor Advisory No. 14, series of 2018 a mangibilbilin kadagiti agpatpatrabaho a mangipaay kadagiti kualipikado nga empleado nga addaan iti banay ti bagi (disabilidad) kadagiti karbengan ken pribilehio, kas sagudayen ti Labor Code.
Malaksid iti daytoy, saan met a mapawilan dagiti employer a mangipaay iti dadduma pay a benepisio nga ad-adu ngem iti minimum nga ibagbaga ti linteg.
Innayon ni Bello a dagiti mangmangged nga addaan iti disabilidad, masapul nga inkapilitan a mairaman iti Social Security System, PhilHealth ken Pag-IBIG, kadagiti situasion a mabalin a mairamanda.
Kas nayon ti service incentive leave nga ibagbaga ti Labor Code, kas naamendaran, maikari pay dagiti empleado a PWD iti Maternity Leave (RA 1161, kas naamendaran iti RA 8262), Paternity Leave (RA 8187), Solo Parent Leave (RA 8972), Violence Against Women and their Children (VAWC) Leave (RA 9262), ken Special Leave for Women (RA 9710).
Ibilbilin ti Magna Carta for Disabled Persons, wenno Republic Act No. 7277, nga awan ti tao nga addaan iti disabilidad a mapaidaman kadagiti oportunidad para iti nasayaat a pannakayempleo, ket ti kualipiko nga empleado nga addaan iti disabilidad, maipaayan kadagiti pribilehio, benepisio, insentibo wenno alawans a kas iti kualipikado nga empleado nga awanan iti banay ti bagina.
(Naipablaak iti Oktubre 1, 2018 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti BUQO, MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment