Mapadayawan ti dua a mabigbig a mannurat iti Ilokano, da Cles B. Rambaud ti Pinili, Ilocos Norte ken Eden Cachola-Bulong ti Narvacan, Ilocos Sur a kas 2018 Pedro Bucaneg Awardee ken 2018 Leona Florentino Awardee, kas panagsaganadda, kas impakaammo ti Awards Committee ti GUMIL Filipinas.
Ti Pedro Bucaneg Award (para lallaki) ken ti Leona Florentino Award (para babbai) ti kangatuan a pammadayaw a maipaay ti GUMIL Filipinas kadagiti agsursurat iti Ilokano a nakaipaay iti naisangsangayan a gapuanan— sinurat ken tignay— iti pannakapadur-as ti Literatura Ilokana.
Mapadayawan ni Rambaud, editor ti Bannawag “gapu kadagiti sarita, salaysay, daniw ken komiksna a nangnangruna a mangiladawan kadagiti kadawyan a mapaspasamak iti Kailokuan ken panangimutektekna iti kinapudno, kinaimbag ken kinalinteg iti gimong a paggargarawan dagiti Ilokano ken uray ti ania a puli, ken nangnangruna pay iti agtultuloy a panangipategna ken panangitaltal-ona iti pagsasaotayo nga Ilokano babaen ti panangurnosna iti ortograpia ti Ilokano.”
Mapadayawan met ni Cachola-Bulong, retirado a mannursuro iti elementaria, “gapu kadagiti saritana a nangilagaana kadagiti balikas a nangiladawan iti biag ti Ilokano, partikular ti babai ken ti relasionna iti pamilia, panggedan ken gimongna.”
Yawatto a mismo ti Presidente ti GUMIL Filipinas, ni Vilmer V. Viloria, kada Rambaud ken Cachola-Bulong ti plake ti pammadayaw ken medalion dagitoy bayat ti pannakarambak ti Rabii ti Selebrasion ken Pammadayaw iti Maika-50 nga Anibersario ti GUMIL Filipinas iti Moonlite Paradise Resort, Barangay Diora-Zinungan, Santa Ana, Cagayan inton Abril 21. (GF Secretariat)
(Naipablaak iti Bannawag iti Abril 2, 2018 a bilang.)
No comments:
Post a Comment