February 13, 2018

Adda umdas a suplay a bagas ti pagilian, kuna ti Malakanyang

Impanamnama ti Malakanyang itay lawasna nga adda umdas a suplay a bagas ti pagilian iti laksid ti report nga agkurkurang daytoy.

Kinuna ni Spokesman Harry Roque a segun ken ni Secretary to the Cabinet Leoncio Evasco, agpapaay pay a chairman ti National Food Authority Council, nga adda nakasagana nga angkaten ti pagilian a 250,000 tonelada metrika a bagas tapno masigurado nga adda umdas a suplay a bagas kadagiti tiendaan.

Adda dagiti report iti kallabes a ti panagkurang ti suplay ti bagas ti NFA ti nangpangina iti bagas ken pannakapilit dagiti nakurapay a Filipino a gumatang iti nanginngina a klase ti bagas.

Inlawlawag met ni Sen. Cynthia Villar, chairman ti komite iti Senado iti agrikultura, a bimmassit ti suplay a bagas nga NFA ta impatulod ti NFA ti adu a lebbenna kadagiti lugar a dinalapus ti kalamidad ken gubat.

Iti agdama, agkurkurang ti Filipinas iti apit a pagay isu a kasapulan nga agangkat iti mapan a 500,000 a tonelada metrika a bagas iti tinawen.


(Naipablaak iti Bannawag, Pebrero 19, 2018 a bilang.)


No comments:

Post a Comment