Alvarez, nangabak iti Pasalip ALVIYA Grand Final

Ni Johmar Rosario Alvarez, tubo iti Mabuttal, Ballesteros, Cagayan ngem agnanaeden idiay Ontario, Canada ti nangabak iti kakaisuna a gunggona iti Pasalip ALVIYA iti Sarita Grand Final (Umuna a Siklo, 2011-2016) babaen ti saritana a “Katataan.”

Premiado a mannurat-mannaniw, editor ken dati a mannursuro iti Aparri West National High School, Bulala Norte, Aparri, Cagayan ni Alvarez sakbay a nagpa-Canada a kas imigrante. Writing Fellow iti 38th UP National Writers Workshop idi 2001. Kaingungotna ni Jhonna Belle A. Clemente, tubo iti Masaya Sur, San Agustin, Isabela.

Maited ken ni Alvarez ti “Naisangsangayan a Gunggona” a kas nagkaykaysaan dagiti hurado a da Cles B. Rambaud, Linda-Lingbaoan-Bulong, ken Joel B. Manuel. Awaten pay ni Alvarez ti sertipiko ken premio a kuarta a P25,000.00. Mayawat ken ni Alvarez ti premiona bayat ti Dap-ayan 2017, GUMIL Filipinas National Convention iti Union Christian College, San Fernando City, La Union itoy Abril 21-23, 2017.

Tinawen a maiwaywayat ti Pasalip ALVIYA ken is-isponsoran ni Alex Vicente Yadao ti New York City, ken imatmatonan met ni Freddie Padua Masuli ti Cagayan State University, Sanchez Mira Campus. (ALVIYA Secretariat)


(Naipablaak iti Bannawag, Abril 24, 2017 a bilang.)