Awan visa iti ipapan iti China, maad-adal

Ad-adalen ti People’s Republic of China (PROC) no mabalin a pastrekennan iti China dagiti sumarungkar sadiay a Filipino uray awan visa dagitoy.

Daytoy ti impalgak ni Jose Santiago “Chito” L. Santa Romana itay lawasna bayat ti panangsalaknibna iti bagina no apay a rumbeng nga aprobaran dagiti senador ken diputado a kameng ti foreign affairs committee ti bicameral Commission on Appointments (CA) ti pannakadutokna a kas Ambassador to China.

Kinuna ni Santa Romana a ti singasing iti “visa-free visit” ket paset dagiti adu a katulagan a napirmaan iti nagbaetan da Presidente Duterte ken Chinese President Xi Jinping iti ibibisita ti immuna iti China sumagmamanon a bulan ti napalabas.

Kinuna pay ni Santa Romana, bayat ti committee hearing nga indauluan ti chairman daytoy a ni Sen. Panfilo Lacson, a nagdoble met ti kaadu dagiti Intsik a bimmisita iti Filipinas kalpasan ti ibibisita ni Presidente Duterte iti China.

Nupay kasta, kinuna ni Santa Romana a saan a kayat a sawen daytoy a pinalukayanen ti Filipinas ti tignayna kontra iti ilegal nga iseserrek iti Filipinas ta rumbeng met a salakniban ti pagilian dagiti bukodna a pagimbagan.


(Naipablaak iti Bannawag, Disiembre 19, 2016 a bilang.)