Inaprobaran ti House Committee on Appropriations itay lawasna ti probision iti pannakapondo ti gakat nga agpanggep a mamagbalin a permanente iti “Pantawid Pamilyang Pilipino Program” (4Ps) wenno iti conditional cash transfer (CCT) program.
Maam-ammonto a kas 4Ps Act (Linteg iti 4Ps), panggep ti gakat nga ipaayan ti tunggal kualipikado a benepisiario iti conditional cash transfer nga agdagup iti P500 iti binulan wenno P6,000 iti makatawen.
Maipaayan pay dagiti agad-adal nga annak ti benepisiario (di ad-adu ngem tallo nga annak) iti conditional cash grant para kadagiti magastosda iti panagadalna, kas sagudayen ti gakat.
Ipaayan ti gakat ti tunggal ubing nga agbasbasa iti elementaria wenno iti hayskul iti P300 iti binulan no la ketdi ta nairuarna amin nga asignaturana kalpasan ti maikadua a tawen a panagbalinna a benepisiario daytoy a programa.
Kinuna ni Marikina Rep. Marcelino Teodoro, maysa kadagiti autor ti gakat, a sipud narugian ti CCT program idi 2008, addan nakita a simmayaatan ti kasasaad dagiti benepisiario.
“Ti naited a cash grants, ninayonanna ti mapastrek dagiti nakurapay a pamilia, nga inggatangda met kadagiti kasapulanda, a nangpasayaat met iti negosio dagiti babassit a negosiante. Malaksid iti daytoy, pinasayaatna ti kasasaad ti salun-at ken panagbasa dagiti ubbing a pinaraburan ti 4Ps,” kinuna ni Teodoro.
(Naipablaak iti Bannawag, Disiembre 28, 2015 a bilang.)
No comments:
Post a Comment