FDA, binallaaganna ti publiko kontra iti food supplement

Binallaagan ti Food and Drug Administration (FDA) ti publiko kontra iti kunana a palso nga ibagbaga ti maysa nga agar-aramid iti food supplemement.

Iti ballaagna, kuna ti FDA a nakitana dagiti anunsio ti food supplement a Flor.Essence a naipablaak iti maysa nga aginaldaw a pagiwarnak iti petsa daytoy a Sept. 24 ken 26.

“Natakuatan a kuna ti nangipaanunsio iti Flor.Essence, maysa a food supplement, a makaagas daytoy iti kanser, banag a panangallilaw dayta iti publiko,” kinuna ti FDA.

Kuna ti FDA a naaprobaran ti Flor.Essence a kas food supplement, saan ket a kas agas wenno medisina.

Innayon ti FDA nga iti anunsio ti Flor.Essence, nangdakamat pay kadagiti testimonia a nakairamanan ti patang a babaen ti “wonder tea” a Flor.Essence, “simmayaat ti kasasaad ni nanangko iti laksid a kinapet ti kanser ken nagpaut pay ti biagna.”

“Tapno maammuan a ti agas ket pudno a makaagas, nasken nga aglasat iti adu a klinikal a panagipadas. Ngem ti anunsio ti Flor.Essence, ibagbagana a makaagas, banag a di rumbeng iti maysa a produkto a naklase laeng a food supplement,” kinuna ti FDA.

Innayon ti FDA a kadagiti immun-unan a pakaammona, maibilang amin a food/dietary supplement a kas naproseso a produkto a taraon laeng a saan ket a naaprobaran a kas agas. (Jonathan Hicap/Jenny F. Manongdo)

(Naipablaak iti Bannawag, Oktubre 13, 2014 a bilang.)