Inna iti Filipinas, di unay mataripato

No iti kinasayaat ti kasasaad dagiti inna iti maysa a pagilian ti pagsasaritaan, adda ti Filipinas iti maika-105 a puesto iti kadagupan dagiti 178 a pagilian iti lubong; a ti Finland ti adda iti kangatuan a puesto idinto nga adda iti kababaan a puesto ti Somalia.

Daytoy ti impalgak ti international aid organization a Save the Children itay lawasna iti inruarna a 15th annual State of the World’s Mothers Report.

Kangrunaan a nakaibabaan ti ranggo ti Filipinas ti nakaddidillaw a nakurang a pannakataripato dagiti inna kalpasan ti didigra, kas ipaneknek ti kasasaad dagiti inna iti Leyte ken dadduma pay a lugar a dinidigra ni Bagyo Yolanda.

Kinuna ni Ned Olney, direktor ti Save the Children iti Filipinas, a bimmaba iti lima a ranggo ti Filipinas iti napalabas a 15 a tawen.

Innayonna a napateg a pagrukodan ti kasasaad ti sibubukel a pagilian ti kasasaad dagiti inna. Dayta ti gapuna a tinawen nga iruarda ti reportda maipanggep iti daytoy.

Adda lima a pakarukodan ti kinasayaat ti kasasaad dagiti inna iti maysa a pagilian: kinatalged ti ina nga agsikog ken agpasngay, ti kaadu dagiti matay nga ubbing nga agtawen iti nababbaba ngem lima, kangato ti nagun-od nga adal ti ina, ti kinarang-ay ti pagilian, ken ti pannakipaset dagiti babbai iti pannakaituray ti pagilian.


(Naipablaak iti Bannawag, Mayo 19, 2014 a bilang.)