March 1, 2014

“Green Super Rice,” dandanin mairuar

Manamnama ti dandanin pannakairuar tapno imula dagiti mannalon ti baro a klase ti pagay a maaw-awagan iti “Green Super Rice” wenno GSR.

“Green” gapu ta saan a makadangran iti aglawlaw (environment-friendly) ta natured kadagiti peste ken saan nga agkasapulan iti adu nga abuno wenno ganagan, ken “Super” gapu ta ad-adu ti maapit iti daytoy a barayti, nakired iti tikag, layus ken pangapgaden (salado) a danum.

Naammuan manipud iti International Rice Research Institute (IRRI) a nalpasen ti umuna a paset ti proyekto iti pannakaparnuay ti GSR nga immabot iti 12 a tawen a panagsukisok.

Nairaman iti panagsukisok ti IRRI a masarakan ti opisinana iti Filipinas ken ti Chinese Academy of Agricultural Sciences (CAAS) iti Beijing, China ken adu a mannalon manipud iti 16 a pagilian iti Asia ken Africa ken panang-cross-breed dagiti sientista iti 250 a barayti ti pagay.

Nakatulong iti pannakaileppas ti umuna a paset ti proyekto ti $18-milion a grant manipud iti Bill and Melinda Gates Foundation a naited idi 2007.

Nangrugi met ti maikadua a paset ti proyekto itay 2013 ken aggibus iti 2015 tapno maisaknap ti pagsayaatan ti GSR iti 500,000 a nakurapay a mannalon iti Asia ken Africa, babaen ti $15-milion a nayon a tulong manipud iti Gates Foundation.


(Naipablaak iti Bannawag, Marso 10, 2014 a bilang.)

No comments:

Post a Comment