February 9, 2014

Trabahador iti konstruksion ken nurse, kasapulan ti Iraq

Kalikaguman ti gobierno ti Iraq ti panangipatulod ti Filipinas kadagiti overseas Filipino workers (OFW), nangruna kadagiti nurse ken kadagiti trabahador iti konstruksion iti nadumaduma a lugar iti Iraq.

Pinatalgedan ni Dip. iti Albay Al Francis Bichara, chairman ti House committee on foreign affairs, a nakimiting ken ni Iraqi Ambassador to the Philippines Ahmed Al Kamaly idi Enero 28, 2014, ti kalikagum ti nasao a pagilian iti Middle East nga agawat kadagiti OFW.

Iti committee hearing itay nabiit, impakaamo ti Department of Labor and Employment (DoLE) a naisaganan ti kopia ti katulagan iti nagbaetan ti Filipinas ken Iraq ken naidatagen iti Department of Foreign Affairs (DFA) itay napan a tawen tapno maaprobaran.

Kanaig daytoy, impanamnama ti DFA a yalistoda ti pannakaaprobar iti labor agreement nga indiaya ti Iraq iti Filipinas.

Nupay suportaranna ti pannakaipatulod dagiti OFW iti Iraq, impaganetget da Akbayan Party-list Rep. Walden Bello ken Gabriela Party-list Rep. Luz Ilagan a napateg a maipanamnama nga umuna ti kinatalged dagiti mangmangged a Filipino iti Iraq sakbay a marugian ti pannakaipatulodda iti nasao a pagiliaan.


(Naipablaak iti Bannawag, Pebrero 17, 2014 a bilang.)

No comments:

Post a Comment