Panangarayat kadagiti baliena, lumbalumba, naisuro kadagiti mangngalap

Ni LEILANIE G. ADRIANO

BADOC, I.N. --Naisuro kadagiti kameng ti Saud-Paratong (SAPAR) Fishermen Association iti daytoy nga ili ti umno a panangarayat kadagiti maisadsad nga animal-iti-baybay a kas kadagiti lumbalumba (dolphin) ken baliena babaen ti workshop a naangay ditoy idi Nobiembre 29.

Mainaig ti workshop iti umad-adu a bilang dagiti animal-iti-baybay (marine mammals) a maidakdaknir kadagiti igid ti baybay iti Ilokandia, isu a nasken ti pannakasanay dagiti “first responders” wenno mangarayat kadagitoy.

Kas kuna ni Sherman Valdez, presidente ti Saud-Paratong Fishermen Association, maibilang dagiti dolphin ken baliena a gagayyem dagiti mangngalap isu a rebbengna a matulongan dagitoy no bilang mayaw-awan dagitoy iti igid ti baybay wenno aksidente a maputipotanda iti iket dagiti padada a mangngalap.

Kinuna met ni Arthur Valente, fishery regulatory officer iti gobierno probinsial iti Ilocos Norte ken nangidaulo iti nasao a workshop, a gapu iti saanen a magawidan a panagbalbaliw ti klima ken maigapu met laeng iti nakaro a pannakaabuso ti aglawlaw a kas iti illegal a panagkalap ken pannakasabidong ti baybay, saan met a makalisi dagiti dolphin ken baliena iti epekto dagitoy.

Kinunana a kaaduan kadagiti maidakdaknir iti igid ti baybay nga animal-iti-baybay ti masaksakit gapu kadagiti makanda a nasabidongan ken no dadduma, mayaw-awan met dagitoy nga agsapul iti pagbiagda.
Paset ti workshop ti pannakataming dagiti maisadsad nga animal-iti-baybay a kas iti pannakaipakat ti first aid kadagitoy sa maisublida met laeng iti taaw. Ngem no bilang ta saanda a makalasat, maipaayan met dagitoy iti umno a pannakaidulin.

Nasursuruan dagiti kameng ti SAPAR Fishermen Association iti Badoc, Ilocos Norte no kasano a tulonganda dagiti lumbalumba (dolphin) ken baliena no bilang ta maisadsad dagitoy iti igid ti baybay. (Rinetrato ni Leilanie G. Adriano)

Naipaganetget pay ti saan koma a pannakakalap dagitoy ta nakisangen ti bilangda ken tumulongda koma dagiti mangngalap a mangsaluad iti taaw.


(Naipablaak iti Bannawag, Disiembre 16, 2013 a bilang.)