Agannad iti makasabidong a dekorasion iti Paskua

Maysa nga environmental group ti nangballaag kadagiti umili itay lawasna iti panagannadda kadagiti magatang a dekorasion iti Paskua kalpasan a matakuatan nga adu kadagitoy ti addaan iti nangato nga imetna a “lead” wenno buli a makadadael iti salun-at.

Iti panangamiris ti EcoWaste Coalition Project Protect kadagiti lako a dekorasion iti Paskua iti sumagmamano a pagtagilakuan iti Divisoria ken Quiapo iti Manila, Monumento iti Caloocan City ken Nepa-Q-Mart iti Quezon City, natakuatan, babaen ti panagusar iti x-ray fluorescence (XRF) analytical device, ti kaadda dagiti makasabidong a kemikal a ramen dagitoy, kas iti antimony, arsenic, cadmium wenno chromium a nangatngato ngem iti kabaelan ti bagi nga agsepen.

Kangrunaan ketdi a pakariribukan ti grupo ti kaadda ti ramen a lead dagiti inamirisda a dekorasion iti Paskua ta napeggad daytoy iti salun-at uray “low level” daytoy.

Innayon ti grupo a kangrunaan a maapektaran dagiti ubbing ta nakapsut pay laeng ti resistansiada ken madama pay laeng ti pannakadebelop ti bagida.

Kuna pay ti grupo a dagiti dekorasion iti Paskua, makadkadanon met uray kadagiti adayo a probinsia—ket rumbeng laeng a maballaagan dagiti umili a pilienda koma dagiti gatangenda wenno nasaysayaat pay, agusarda laengen kadagiti material nga adda iti aglawlawda.


(Naipablaak iti Bannawag, Nobiembre 25, 2013 a bilang.)