National Artist Award kada Caparas ken kakaduana, imbabawi ti Korte Suprema

Imbabawi ti Korte Suprema itay Hulio 16 ti kontrobersial a panangisaad ni dati a Presidente Gloria Macapagal-Arroyo iti National Artist Award kada comic strip artist ken film director Carlo J. Caparas, fashion designer Jose “Pitoy” Moreno, theater artist Cecile Guidote-Alvarez ken architect Francisco Mañosa idi 2009.

Babaen ti botos a 12-1-2, indeklara ti kangatuan a pangukoman nga imbalido dagiti Proklamasion Blng. 1826 agingga iti 1829 nga impaulog ni Arroyo idi Hulio 6, 2009, a nangideklara kada Guidote-Alvarez, Caparas, Mañosa ken Moreno kas National Artist gapu ta naipaulog dagitoy babaen ti nakaro a panangaburo iti diskresion wenno wayawaya a mangpili, ngarud, naibilin ti pannakaiwalin dagiti nasao a proklamasion.

Kuna ni Theodore Te, pannakangiwat ti Korte Suprema, a mainaig ti desision ti Korte iti petision nga impila ti grupo dagiti National Artist a da mannurat Virgilio Almario ken Bienvenido Lumbera, eskultor Napoleon Abueva ken pintor Arturo Luz.

Saan a nagbotos dagiti Associate Justice a da Mariano del Castillo ken Marvic Leonen. Kas ken ni Te, nagpaay ni Leonen a pannakaabogado dagiti nagpetision iti kaso. Saan met a nakadar-ay iti sesion ni Associate Justice Arturo Brion gapu iti parikut iti salun-at.

Kuna ti National Commission for Culture and the Arts (NCCA) a ti desision ti Korte Suprema, maibilang met a balligi ti NCCA ta saan a nakonsulta daytoy no asino dagiti mapili a National Artist.

Innayon ti NCCA a saanna a kuestionaren ti kredensial dagiti nadakamat nga artist a naibabawi ti award-da no di ket ti wagas ti pannakapilida.

Kuna pay ti NCCA a mabalin manen a mainominar da Caparas ken kakaduana tapno aglasatda iti umno a proseso ti pannakapili dagiti National Artist.

(Naipablaak iti Bannawag, Hulio 29, 2013 a bilang.)