April 11, 2013

“Bulan ti Literatura Ilokana,” rambakan ti GUMIL Filipinas


Rambakan ti GUMIL Filipinas, ti gunglo dagiti mannurat nga Ilokano iti Filipinas, ti Abril a kas “Bulan ti Literatura Ilokana” babaen ti panangangayna iti Maika-45 a Kombension ken Literary Seminar ti gunglo iti Gonzaga, Cagayan iti daytoy nga Abril 19-21.

Manamnama nga atendaran ti ag-200 a mannurat nga Ilokano manipud iti Filipinas ken iti ballasiw-taaw ti nasao a pasken nga addaan iti tema, “Agkaykaysa, Pumigpigsa” ken iti panangidaulo ti agdama a presidente ti gunglo, ni retirado nga RTC Judge Vivencio S. Baclig.

Mairaman kadagiti maaramid iti agtallo-nga-aldaw ken agdua-a-rabii a pasken ti pannakaangay dagiti lektiur maipanggep iti panagsurat, pannakapadayaw dagiti nangabak a mannurat kadagiti nadumaduma a salip iti panagsurat, pannakapili ti Mutia ti GUMIL Filipinas 2013, eleksion ti baro a grupo dagiti opisial ti gunglo nga agtakem iti 2013-2015, kdp.

Dagiti mangsangaili iti pasken: GUMIL Cagayan nga idauluan ni Arthur P. Urata, GUMIL Gonzaga nga idauluan ni Herman Cardenas, ken ti gobierno lokal ti Gonzaga nga idauluan ni Mayor Carlito Pentecostes.
Naituding ti Abril a kas “Bulan ti Literatura Ilokana” babaen ti bileg ti Proclamation No. 26, s. 2001 nga impaulog ni Presidente Gloria Macapagal Arroyo.


(Naipablaak iti Bannawag, Abril 22, 2013 a bilang.)

No comments:

Post a Comment