March 14, 2013

Grand Centennial Alumni Homecoming ti ISPSC: Abril 1-2


Rambakan ti Ilocos Sur Polytechnic State College (ISPSC), dati nga Ilocos Sur Agricultural College (ISAC), Santa Maria, Ilocos Sur ti maika-100 a tawenna inton Abril 1-2, 2013. Ti tema ti Grand Centennial Alumni Homecoming: "Panagsubli iti Ingungotentayo a Pagadalan - Pagsayaatan, Panagrang-ayna, Pagtititinnulongan."

Manamnama ti idadar-ay amin a nagturpos iti daytoy a pagadalan iti hayskul ken kolehio, ditoy ken iti ballasiw taaw. Paset ti programa ti pannakaited ti pammigbig kadagiti nagturpos a nangted iti pammadayaw iti nasao a pagadalan.

Idauluan ni Dr. William D. Dar, dati a Secretary of Agriculture idi panawen ni Presidente Fidel Ramos dagiti nagturpos a mapadayawan.

Addanto pay maangay a misa ken motorcade iti ili ti Santa Maria. Makipagragragsakto met dagiti alumni iti maaramid a piesta ti Santa Maria iti rabii ti Abril 2 iti panangangaili kadakuada dagiti opisial ti ili nga ipanguluan ni Dr. Edgar C. Florendo, agdama a Mayor. (Jovito F. Amorin)


(Naipablaak iti Bannawag, Marso 25, 2013 a bilang.)

No comments:

Post a Comment