10 a nangato-ti-sueldona a trabaho, inlista ti DOLE

Kas tulong iti panangpili dagiti estudiante iti kurso a yenrolda iti sumaruno a panagseserrek, inlista ti Dept. of Labor and Employment dagiti umuna a 10 a trabaho iti Filipinas a dakkel ti sueldona, kas maibatay iti panagsukisok ti Bureau of Local Employment (BLE).

Adtoy dagita a trabaho, kas kuna ni Labor Secretary Rosalinda Baldoz: dagiti trabaho a mainaig iti aviation, banking and finance, business processing outsourcing, creative industries, cyber services, manufacturing, ken mining.

Kuna ni Sek. Baldoz a kas pagarigan ti maysa nga art director, nga adda iti babaen ti creative industries, sumurok-kumurang a P69,286 ti binulan a sueldona; mapan met a P64,889 ti sueldo iti binulan ti maysa a geologist.

Iti listaan ti BLE, ti aircraft pilot, navigator, ken ti flight engineer, mabalin nga umawat ti tunggal maysa kadakuada iti sumurok-kumurang a P57,638 a sueldo iti binulan; ti mining engineer ken metallurgical engineer, P55,638; ti computer programmer, P43,573;

Systems analyst ken systems engineer, P42,112; production supervisor ken general foreman, P36,133; actuarian, P35,480; call center representative/customer service associate, P35,424; ken statistician, P35,010.

Inlawlawag ketdi ti labor chief a dagiti naagapad a sueldo ket saan a pangrugian a sueldo no di ket nagun-od dagitoy kalpasan ti sumagmamano a tawen a padas iti trabaho.


(Naipablaak iti Bannawag, Pebrero 25, 2013 a bilang.)